Tlabung kawng thla 5-ah a chhe leh nghal MZP-in siamṭha vat turin PWD an phût

MZP sub-headquarters, Tlabung chuan thuchhuah siam­in, National Highway no. 302, Tla­bung leh Lung­lei inkar kawngpui chu siam zawh a nih aṭanga thla ngaah a chhe leh tawh hle tih an tarlang a, a rang lama siamṭha leh thuai turin PWD an phût.

Tlabung MZP chuan, Lunglei-Tlabung kawngpui chu hun rei tak siam a nih hnuah May 2019-ah siam zawh a ni tih sawiin, "Siam zawh a nih aṭanga kum chanve pawh a tlin hmain a chhe leh tawh hle a, hmun ṭhenkhatah phei chuan motor kal fimkhur ngai khawpin a chhia a, kawng metal hmuh tur alkatra pawh bo vek khawpin a chhe hial tawh a ni," an ti.

Kawngpui siam tlo lo lutuk chu mak an tih thu sawiin MZP Tlabung chuan, "Fûr khat pawh daih lo leh an siam aṭanga kum chanve pawh tling lo kawngpui an siam hi MZP, Tlabung chuan pawi kan tiin, a lungchhiatthlak kan ti tak zet a ni," an ti a; kawngpui chu a rang lama siamṭha leh thuai turin PWD thuneitute an phût a ni.

Tlabung MZP president Vanlal­lawma chuan, Lunglei-Tlabung kawng chu siam a nih laiin hlawm (package) pathumah ṭhen a nih thu sawiin, "Tun dinhmunah chuan package-1 hi chu a la ṭha viau a, package-2 erawh chu a chhe nasa tawh a, motor te tan phei chuan tlan a harsa a, a ngaihna a awm lo," a ti.

Vanlallawma chuan, package-1 siamtu chu L&T, Lunglei an nih thu leh nikum lamah an siam zawh tawh thu a sawi a; PWD engineer-te'n an hrilh dan chuan, package 2 leh 3 chu kumin May thla vela siam zawh a nih thu a sawi thung.

Lunglei-Tlabung kawng siam hi July 7, 2017 khan siam a nih mek laiin chutih laia PWD chief engineer (Highways) K Lalsawmvela'n a enfiah a; chumi ṭuma Lungleia chanchinbumite hnena a sawi danin, kawng thawm ṭhat hna chu cheng nuai 85 hmangin thawh a ni.

K Lalsawmvela sawi danin, Lunglei-Tlabung thawm ṭhat hna chu hlawm thumah ṭhen a ni a, km. 0-30, km. 30-60 leh km. 60-94 ahte ṭhen a ni. Km. 30-60 inkar siam hna chu RV Hluna, Aizawl hnenah pek a ni a, km. 60-94 inkar siam hna chu JP Project pek a ni thung.

Kawng siam lai chu February 3, 2018-ah Lungsen Group YMA hruaitute'n an enfiah a; media lamah chuan, kawng siam hna thawktu chu ABCI an ni a, ABCI-te chu chak zawka hna thawk turin an chah a ni. Kawng siam lai chu Tlabung MZP hruaitute pawhin PWD Lunglei Division hotute nen September 8, 2018-ah tlawhin, Pakage-3, km. 60-94 chhung bik an endik a, hotute nen an enho a; chumi ṭum chuan kawng siamtu GP Project chu a chak thei ang bera hna thawk turin an ngen.

Tlabung MZP vêk hian October 16, 2018 khan Lunglei-Tlabung kawng siamnaa package-3 siamtu GP Project Ltd. lakah Anti-Corruption Bureau (ACB)-ah FIR an thehlut. MZP-in FIR an thehluh chhan chu - kawng siamna atan GP Projects-in sum an hman tawh zat nia an sawi cheng nuai 480 chu an hnathawh tawh dan nen a inmil lo a, thil dik lo a awma an hriat vang a ni.

FIR an thehluh chung­changah hian Tlabung MZP President chuan, "Kan hriat dan chuan, ACB-in an chhui zui a, a hmunahte pawh an rawn kal a, an thil chhui dante pawh Chief Secretary (Chief Vigilance Officer) hnenah an thehlut a ni. Keini chuan kawng siam­tute jail tàntir hrim hrim kan duh a ni lo a, kawng ṭha neih kan duh a ni mai," a ti.