KHAWTHLIR

Land Revenue & Settlement (LRS) department chuan hriattirna ti­chhuakin, notified forest area huam chhungah ram inpek khap a nih thu leh notified forest area chhunga ram neih tumte tan ngaihven zui theih a nih loh thu a tarlang.LRS department tarlan danin, Mizorama hmun ṭhenkhat, danin emaw, sorkarin emaw mimal tana ram pek a khap tlatna awm sa a awm a; notified forest reserve chhung emaw, notified town area chhung emaw, huan atana ram dilnate chu phalsak theih a ni lo a ni.

Mizoram University-a Department of Ma­nagement chuan nimin khan Management Fest 2019 an buatsaih ṭan a, MZU registrar Prof. Lalnundanga'n a hawng. Management Fest-ah hian intihsiakna chi hrang hrang buatsaih a ni a, vawiinah chhunzawma zawh a ni ang.

UDPA department-in Lawngtlaia hmun pa­hniha vantlang inthiarna in (public toilet) an sak chu Thawhlehni khan a enkawltu turte hnen­­ah an hlan. Vantlang inthiarna hi Lawngtlai District Hospital-ah leh Chandmary Vengah an sa a, Rs. 7,00,000 ve ve senga sak a ni a; UDPA hnuaia district project officer Ro­chuangkimi Khenglawt-in damdawi-in thuneitute leh Chandmary khaw­tlang hruaitute hnenah a hlan a ni.

Mamit district-a UDPA department chuan October 22, Thawhlehni khan India ram puma plastic hman tihtlemna tura beih­pui thlakna, Swachhata Hi Seva hnuaiah Mamit khawpuia zirlai naupangte pualin faina campaign leh plastic thenfai hnatlang an huaihawt. He hunah hian Children Sanitation Club (CSC) member-te leh Presbyterian English School zirlaite an thawk chhuak a, Mamit khawpuia plastic bawlhhlawhte an chhar fai a ni.

Mizoram Youth Commission (MYC) chairman Dr Vanlalṭanpuia, MLA chuan nimin khan All Mizoram Karate Association (AMKA) silver jubilee lawmna leh 23rd AMKA State Karate Championship, Dawrpui Multipurpose Hall-ah a hmanpui. Dr Vanlalṭanpuia chuan, HIV/AIDS-in Mizoram a rûn mek tih sawiin, "Mizo­ramah HIV vei zat tun hnaia a pung nasa hi a pawi em em a, ṭhalaite'n hnam chhan nan nun kan uluk a ṭul a, sorkar ang pawhin nasa zawka hmalak a ṭul a ni," a ti.