Mipuite duh tak sorkar siam turin Kan inpeih tawh - ZPM Secy General

Zoram Peoples' Movement (ZPM) secretary general K Sapdanga chuan nimin khan Champhai Press Club-ah thuthar thehdarhtute a kâwm a, Mizoram mipuite'n an duh tak sorkar siam turin ZPM chu hmanrua atan an inpeih thu a sawi.

K Sapdanga chuan, ZPM-in an din aṭanga thla 15-naah MLA inthlanpui an hmachhawn thu sawiin, "Aizawl khawpui tak ngial pawh kan fan chhuah mumal loh laia bial pariata thlan tlin kan ni leh bial 10 laiah pahnihna sang taka kan ni thei kha Pathian hnathawh ropui tak a ni. Kum 2023 inthlan leh hunah chuan Mizoram mipuite'n an duh tak sorkar an tun din theihna turin ZPM chu hmanrua atana kan inpeih tawh," a ti.

Kalphung thar sorkar an zawrh zel tur thu sawiin K Sapdanga chuan, "Roreltu chauh ni lo, rawngbawltu sorkar din a ni dawn. Mipui tan Sakhaw zalenna humhim a ni ang a, ramri buai chingfel turin hma kan la ang. Chakma foreigner-te chungah dan lek a ni ang," a ti a; Mizo hnam tlêmtê, ram zím taka chêng mekte an him theih nan ram dang mi vulh len ching sorkartir chi an ni tawh lo tih a sawi.

ZPM Secretary General chuan an MLA-te chungchang sawiin, "Indian Constitution Schedule 10-a 'Anti Defection Law' chu thlan tlinte'n anmahni thlang tlingtute an uiresan khapna dan a ni. Assembly Speaker-in ZPM MLA-te chu anmahni thlang tlingtu mipuite party dina tel ve a khap a, uiresan turin a nawr a ni," a ti.