Kan hnam sipaite khan inphat loin ram tan an bei - R Lalzirliana

Minister R Lalzirliana chuan, "Kan hnam sipaite khan inphat miah lo, in surrender (inpe) miah loin ram tan an bei a ni," tiin, hnam sipaite'n chawimawi an phù thu a sawi.

Mizo National Women Front (MNF party-a hmeichhe pawl)-in nimina Saitual BRC Hall-a Mizo hmeichhia, ram tana pên chhuakte chawimawina an buatsaihah thu sawiin R Lalzirliana chuan, "Kan hnam sipaite khan inphat miah lo, in surrender miah loin ram tan an bei a, chawimawi an phú tak zet a ni. Mite ṭhatna aiin chhiatna lam sawi nuam kan ti zawk a, mi fakna leh chawimawina awka lo chhuak ṭhin hi thinlung ṭhatna aṭanga lo chhuak a ni," a ti.

R Lalzirliana chuan, Saitualah Mizo hnam tana inpe mi eng emaw zat, la dam leh dam tawh lote an awm thu sawiin, "He laiah hmeichhia 26 chawimawi tur kan nei hi inchhuanna tham a tling," a ti a; a hun laia ramhnuaia kalte an fakawm em em rualin, in lama ṭangkai tak tak hmeichhiate pawh an ngaihsanawm thu a sawi.

Mizoramin zalenna famkim la nei lo mah se, ram leh hnam tana theihtawp chhuah a nih phawt chuan Mizo ram leh hnamin hma a la sawn zel dawn tih sawiin Lalzirliana chuan, "Indepen­dence sualtute tawrhna avang khan Mizote hi khawvel hriatin kan awm phah mek zel. Kan hnampa Pu Denga leh a hote kha theihnghilh ngai lo ang u, kan chawi­mawi thiam poh leh kan sang zel ang," a ti.

Minister R Lalzirliana chuan, hmei­chhiate'n an hnampuite nun an chhan theih rualin, thiam loh chantirtu an ni thei bawk tih sawiin, "Mizo hmei­chhiate hi mipa aiin an káwlhráwng zawk emaw tih mai turin, hnam dang pasal nei an tam em em a, mipa zingah hnam dang nupui nei chu kut zungṭang thliaka chhiar tham lek an ni. Mizo mipate hian kan châwm zo tâwk lo nge, kan duat thiam loh vang tih pawh nasa taka kan inen lêt a ngai," a ti a; mipate'n hmeichhiate ṭangkaina an hriatsak a ṭul rualin, hmeichhiate'n in chhung khawsaknaah a chin tâwk an hriat a ngaih thu a sawi.

Mizo hmeichhia, ram tana pên chhuakte chawimawinaah hian mi 26 hnenah chawimawina thuchei leh par­ṭhi hlan a ni a, an zingah thi tawh mi pali an awm. Chawimawina inkhawm hi Saitual MNWF Lalthansangi'n a kaihruai a, MNWF headquarters president K Lalrengpuii'n thu a sawi bakah, martar-te sûnna hun hman a ni.