Bethel Centre-ah female ward hawng

Agriculture minister C Lalrinsanga chuan a bial chhung, Chhûmliamkâwn, Lungleia Bethel Centre-ah female ward thar a hawng. 

Female ward buil­ding hi chhâwng hnih, a dung ft. 48 leh a vâng ft 24 a ni. Hawnna inkhawm hi Bethel Centre superintendent K Lal­tawnga'n a kaihruai a; Minister chuan, "Hnuchham, fahrah leh riang­vaite enkawl hna hi hna ropui tak, khawtlang, mahni mihringpuite leh Pathian rawngbawlna a ni," a ti a; phal taka Centre hnena thilpek pe ṭhintute hnenah lawm­thu sawiin, pek chhunzawm zel turin a ngen nghal.

C Lalrinsanga chuan, Bethel Centre-a naupang awmte chu mahni inrintâwkna, taimakna leh hmathlir thui tak neia lehkha zir turin a chah a, "Rilru beidawnna leh lungngaihna in neih chángin Pathian hnenah thlen ṭhin ula, nangmahni hmangaih em emtu mi tam tak in nei tih hre nawn fo rawh u," a ti.

Bethel Centre hi February 12, 2003-a din a ni a, a din tirh lamah chuan ruihhlo ngaite enkawl niin, a hnuah naupang, nu leh pa enkawltu nei mumal lo, hlam­chhiah, retheih vang leh fahrahte enkawl tel leh a ni. Child Welfare Committee-in naupang an dah kum 1-18 inkar mi 85 (mipa 44 leh hmeichhia 41) enkawl mek a ni a; centre din tirh aṭanga naupang an enkawl tawh zawng zawng chu mi 781 niin, mipa 538 leh hmeichhia 243 an ni.