Zophaiah Mosolman mosque Sak chhunzawm leh a ni
Bairabi Zophai hmuna Mosolman-te'n mosque (biak-in) an sak chu sorkar thuneitute'n an bawhzui vanga hun eng emaw chen an chawlhsan hnuah, tun hnai aṭang khan an sak zawm leh a, nimin thleng khan an sak chhunzawm zel.
August 6, 2019-a Mizoram leh Assam ramri ngaihtuahtu tura din Core Committee-te an chairman Lalnunmawia Chuaungo, chief secretary hoa ṭhukhawm chuan, Zophaia mosque sakna hmun chu Mizoram chhung a nih thu an tarlang a; status quo (Mizoram leh Assam aṭangin khawih lo ve ve tura dah) kenkawh tur a nih avang leh dan loa mosque sak a nih vangin, Environment, Forest and Climate Change (EFCC) department chu mosque satute hna thawk tawh lo tura hriattirna pe tura tih an ni.
Core Committee thupek bawhzui hian September 10, 2019 zan khan Barabi Zophaia Mosolman biak-in satu Kachurchol Masjid Committee hnenah Kolasib DFO hmingin mosque sa chhunzawm lo tura hriattirna pek a ni a; hriattirna copy chu Kolasib DC leh SP-te pawh pek an ni.
Kolasib DFO-in hriattirna a pekah hian, hun tiam awm loin mosque satute chu hna chawlhsak tura hriattir an ni. Mosque sa tawh lo tura tih an nih chhanah - Reserved Forest area chhungah forest lam kaihhnawih loh thil an tih vang a nih thu tarlan a ni bawk.
Kolasib DFO-in lehkha a pek hnuah mosque sak hna chu chawlhsan a ni a; hun eng emaw chen an chawlh hnuah tun hnai khan an sak chhunzawm leh a ni. Core Committee chuan meeting an neih ṭumin, hriattirna pek a nih hnua awmzia a awm lo a nih chuan Home Minister hoa sawihoin, Mizoram Police leh EFCC department ṭangkawpin mosque sak mek chu ṭhiah a nih theihna atana hmalak ni se, an ti. Meeting leh hun atan September 27, 2019 chawhnu dar 2:30 an ruat nghal.
Hetih lai hian, Core Committee hi an ṭhutkhawm leh hun tura ruatah an ṭhukhawm lo a, member-te chu ṭhutkhawm leh hun hriattir an nih tur thu hrilh an ni.