Amendments to Indian Forest Act Draft-in Art. 371G a khawihah ngai

Mizoram sorkar chuan October 21, 2019 khan Draft Amendments to Indian Forest Act, 2019 chungchanga Mizoram sorkar ngaihdan sorkar laipuiah a thlen a; dan thar ruahmanna chuan Indian Constitution-a Mizo­ramin special provision a neihna Article 371G a khawih thu an tarlang.

Mizoram sorkar chuan, Draft Amendments to Indian Forest Act, 2019 chungchanga a ngaihdan hi Environment, Forest & Climate Change (EFCC) secretary Ajai Saxena hmingin Director General of Forest & Special Secretary hnenah a thawn a ni.

Lehkhaah hian, EFCC minister TJ Lalnuntluanga kaihhruaina hnuai­ah sorkar official, political party, tlawmngai pawl, kohhran leh zirlai pawl hruaitute'n Indian Forest Act chungchangah meeting an neih thu tarlan a ni a, "Meeting chuan draft amendment hi a pawm thei lo a, provision tam tak paih a ngai. Indian Constitution-a Mizoramin special provision a neih Article 371G chhunga mi customary law te, ram neitu nihna leh inhlan chhâwn dante a khawih a ni. Hei bakah hian, autonomous district council-te 6th Schedule-in thuneihna a pek pawh a khawih tel bawk," tih a ni.

Tlang ram lo neih tihtawp tumna a awm chu Mizo tan a ṭhat loh thu EFCC Secretary chuan tarlangin, "Tlang ram lo neih hi Mizo society-ah a bet tlat a, kum 2011-ah chuan Mizoram mihring zinga 54.9%-in tlang ram lo neih an la kalpui a ni. Tlang ram lo neih hi tihtawp a nih chuan tlang ram lo neih hmanga ei zawng, thil danga eizawnna la nei si lote tan a pawi dawn a ni," a ti a; village council-te'n ram ṭheh tura thuneihna an neih ṭhin Joint Forest Management Committee-in a chhuhsak tur chu ṭha an tih loh thu a tarlang.

EFCC Secretary lehkhaah hian Mizoram tana ṭha lo leh a ṭhat loh chhan section hrang hrangte tarlan a ni a; "He draft amendment hian thuneihna sem zâi leh Constitution innghahna ber pakhat federalism a khawih avangin kan pawm thei lo a ni," tia ziah lan tel a ni.