KHAWTHLIR

Art & Culture department, Mizoram Independent School Association (MISA) leh MCAA-te chuan nimin khan Lunglei Chanmari YMA Hall-ah 'Cultural Festival for Students 2019' an buatsaih a, MJA, Lunglei district president H Lalthansanga'n a hawng. H Lalthansanga chuan, Mizo hnam nunphung mawi tak tak, ṭhangtharte'n an bosal mekte chu zirlaiteah tuh thar a, aia upa zah leh tlawmngaihna chung­changte inzirtir a ṭul thu a sawi. He hunah hian english medium school 12 an tel a, hnam làmte entir a ni.

Mizoram sorkar chuan November 5, 2019-a Sinlung Hills Council (SHC) inthanpui awm turah, SHC huam chhunga sorkar hna­thawk zawng zawngte'n vote an thlak theihna tur­in, inthlan vote thlak ni - November 5 chu SHC chhunga mite tan chawlh (holiday)-ah a puang.

Eye Care Centre, Aizawl chuan nimin tlai khan Hotel Floria Leikapui Hall-ah an kum 20-na, china jubilee an lawm a, Health minister Dr R Lalthangliana'n a hmanpui. Health principal director Dr F Lallianhlira bakah, Kolkata, Guwahati leh Silchar-a mit doctor-te pawhin an hmanpui. Zanah scientific session neiin, mit natna leh enkawl dante sawiho a ni. Eye Care Centre hi Dr KL Remsanga leh a thawhpuite'n an din a ni.

India rama zirlai theih­na (talent) nei ṭhate chherna, Pradhan Mantri Innovative Learning Prog­ramme, DHRUV chu October 23, Nilaini khan New Delhi-a Siri Fort Auditorium-ah khâr a ni. Khârnaah hian Vice President M Venkaiah Naidu khuallian a ni a, Human Resource Development minister Ramesh Pokhriyal Ni-shank, minister of state Dhotre Sanjay Shamrao leh sorkar laipui hotu dangte an tel. DHRUV-ah hian Mizoram aṭangin Lalruatpuii, Mizo H/S a tel ve a ni.