State Games logo leh mascot tlangzarh
Sports & Youth Services (SYS) minister Robert Romawia Royte chuan nimin khan a pisaah thuthar thehdarhtute a kâwm a, kumin December thlaa neih tur Mizoram State Games logo leh mascot a tlangzarh nghal.
SYS Minister chuan, Mizoram State Games (MSG) neih turah media-te chu thawhpuiah sáwmin, "MSG-ah hian media-te hi sport player tluka pawimawh in ni. Games hi sport tihhmasawnna mai bakah, tourism lam pawh a tihhmasawn ngei kan beisei," a ti.
Robert Romawia chuan, hun rei tak chhung MSG buatsaih a ni tawh lo chu Mizo ṭhalaite'n an tuar nia sawiin, "Sport item tam tak, tun hmaa kan neih ṭhin, tuna kan neih tawh ngai lohte pawh MSG hian a rawn ṭhuai
nung leh dawn a ni," a ti a; MSG chu tualchhung TV-ah live-a pek chhuah a nih theih nan leh ram pawn TV channel-ah pawh chhuah a nih theih nan hmalak a nih thu a sawi.
Sports Minister chuan, Serchhip Dawngzawl ramah Mizoramin 'Paragliding Accuracy World Cup 2020 and Grand Festival' a thlen dawn thu sawiin, "A hun tur hi February 10-16, 2020 a ni a, KṬP inkhawmpui nen a inhnaih hle a, KṬP inkhawmpuia kalte tana chhim theih tura dil kan tum," a ti.
MSG hi December 9-13 inkara neih tur a ni a, sport discipline 32 a awm dawn a; mipa tan item 132, hmeichhe item 88 leh mixed item pakhat, a vaiin item 221 a awm dawn. Medal pawh gold 403, silver 403 leh bronze 565 sem tur a ni.
MSG-a hriat tur pawimawhte
# Player-te voter ID/Aadhaar card neihna constituency tan chauh an khel thei.
# Discipline-ah mi tu pawh an duh zat zat an tel thei.
# Mimala medal la hnem ber mipa leh hmeichhia lawmman siam a ni ang.
# Kum bithliah a awm lo.
# National Federation Games rules hman a ni dawn.
# Indigenous games-ah chuan Mizoram Indigenous Games rules hman tur a ni.
# Lungawi lote chuan Jury of Appeal chairman hnenah an thlen thei ang.
# Constituency tih ṭhat dan teh nan medal tally hman tur.
# Overall championship thlan a ni ang a, pahnihna leh pathumna trophy pek tur a ni bawk
# Sports association-te inelna atan best discipline lawmman siam a ni dawn.
# Jersey leh a ṭul ang chu Constituency Level Committee-in an inngaihtuah ang.
# TA/DA chu Constituency Level Committee-ah a hlawma pek chhuah tur a ni.
# Price money siam tum a ni a, discipline tin champion hnenah trophy pek a ni ang.
# A hawnnaah air show neih tum a ni.