1987-a MNF MLA-te dinhmun leh ZPM MLA-te an inang - Champhai ZPM

Zoram People's Movement (ZPM) Champhai North Block leh South Block office bearer-te chuan October 23, Nilaini zing khan Champhaia Hranga Plaza Hotel-ah joint meeting neiin resolution an pass a, tuna ZPM candidate thlan tlin takte dinhmun leh 1987-a independent candidate MNF-in an thlawpte dinhmun chu thil thuhmun a nih thu an sawi a; chutihlaiin MNF-te chu ZPM candidate tling ta MLA-te tibuai luiah an puh.

Champhai ZPM-te chuan, tun hnaiah chief minister Zoramthanga'n ZPM MLA-te dinhmun tihbuaia awm chu anmahni intibuai ni âwm angin a sawi tih sawiin, "Kum 1987 MLA inthlana MNF candidate-te'n independent-a an chuha an tling leh, tuna ZPM candidate-te independent-a an chuha an tling hi an dinhmun a thuhmun chiah a ni. Ram hruaitu hmasate'n heti zawng hian an rorelpuite an tibuai duh ngai lo ang khan, MNF hotupa hian a rorelpuite tihbuai dan a dap ngar ngar hi bànsan ve tawh turin kan ngen a ni," an ti.

Champhai ZPM meeting hi headquarters aṭangin secretary general K Sapdanga leh general secretary R Lalchhuanawma ten an telpui a ni.

#    ZPM General Headquarters-in kumin 2019-a Vangpui Fehchhuah programme siama khaw tê leh khaw lian an hrût hi lawmawm kan ti a, kan headquarters hotute taimakna kan chhuang a, kum thara village council/local council inthlan leh, kum 2023-a MLA inthlan awm tur atan bul ṭan dan tur dik takah kan ngai.

#    ZPM-in a thlan tlin MLA-ten Zoram People's Movement Legislature Party an din, Assembly Speaker-in January 3, 2019-a a pawm diam tawh, ZPM party tihbuaina atana ṭhiahtir leh a ni hi kan dem. Assembly Speaker-in hawihhâwm taka rorel a tum kha chhuanawm kan ti a, chutih laiin, politics rilru chhe tak pú hotu sang lamin ZPM MLA-te buaina siamsak tura nasa taka an nawr nia lang hi a pawi kan ti a, kan dem a ni.