Siaha khawpui kawngpui siam enfiah

Minister of state Dr K Beichhua chuan nimin zing khan a bial, Siaha khawpui chhunga kawngpui, PWD-in an thawm ṭhat tawhte leh blacktop hna an thawh mekte a enfiah.

Dr K Beichhua chuan, Siaha khawpui chhung kawngpuite thawm ṭhat zawh a ni ṭêp tawh chu lawm­awm a tih thu sawiin, "PWD, Siaha Division-te'n fûr lai pawhin blacktopping hna châwl loin an kalpui reng thei a, hei hi Mizoram hmun danga PWD-te pawhin entawn thei se a duhawm hle a ni," a ti.

Sorkar thuchhuah tarlan danin, Siaha khawpui kawngpui thawm ṭhat hna thawh chu a tam zawk zawh a ni tawh a, hna thawh mek zel a ni bawk. Kumin chhungin Siaha khawpui chhunga PWD-te chan bik kawngpui chu blacktop hman vek beisei a ni. Kawng ennaah hian Minister hi Siaha DC Bhupesh Chaudhary, additional DC K Vanlalṭhiana leh sorkar official dangte'n an ṭawiawm a ni.