Bru kût - Hodaigri Festival hman a ni

Mizorama Bru-te chuan October 23, Nilaini, nimin leh nizan khan Tuipuibari-ah a vawi khat nan Mizoram pum huap Hodaigri Festival 2019 an hmang a, Nilainia a hawnnaah Tourism minister Ro­bert Romawia Royte-in a hmanpui. He kût hi thlai thar lawmna kût a ni.

Robert Romawia Royte chuan, hmun hrang hrang aṭanga Hodaigri Festival hmang tura pungkhawmte chu chibai bûkin duhsakna a hlan a; Bru-te'n Mi­zote aṭangin zirna, sikul leh Kristianna thlengin an dawng tih sawiin, "Lawm nachang hria a, inpuh chhe zawng leh khawlhkham siam zawng­a awm loin, inzah tawn a ṭul a, khaw­vel hmun hrang hrang thlirin, Kristianna leh sakhuanaa hringtu an zah thiam hle ṭhin a ni," a ti.

Mizoramah Mizote'n hnam dang pawisawi lo mi tumah an la that lo nia sawiin Robert Romawia chuan, "Mizo pawisawi lo eng emaw zat erawh chu hnam dang kut tuarin an thi tawh a, a pawi tak zet a ni," a ti a; hmasawn nana zirna a pawimawhzia sawiin, Bru-te chu zirna uar turin a chah.

Khualzahawm, H Lal­zirliana, Mamit bialtu MLA chuan, Mizoram khawthlang lam hmasawn nan sorkarin rua­hmanna thar tam tak a siam tih sawiin, Bru-te chu rinawm taka anmahni zâwna sorkar ṭawiawm turin a sáwm a ni.

Festival hmanpuitu dang, Pramod Reang, Tripura MLA pawhin thu sawiin, Bru mipui­te chu bialtu MLA leh Mizoram sorkar rinawm taka ṭawiawm turin a chah a, "A vawi khatna atana Hodaigri Festival Mizoram sorkar kal­tlanga sorkar laipui puihnaa hman theih a ni hi hmasawnna duhawm tak a ni," a ti.

Hodaigri Festival-ah hian zai leh hnàm lam chi hrang hrang entir a ni a, Mizo zaithiam­te leh Mizo Cultural Organisation (MCO)-te'n an hmanpui bakah, Mamit leh West Phaileng chheh­vela sorkar officer, khawtlang hruaitute leh kohhran rawngbawltute'n an hmanpui bawk. Kut hmang tur hian Mizoram district hrang hrang, Assam leh Tripura aṭangin mi 300 vel an kal khawm a ni.