Mizoram leh mipuite tan hmalam Kan pan zel dawn - MPC President

MPC party hruaitute chu nimin khan an pisa-ah an ṭhukhawm a, an president Lalhmangaiha Sailo chuan Mizoram leh mipuite tan hmalam pana ke an pen zel dawn thu a sawi.

Lalhmangaiha Sailo chuan MPC vuan tlattute avangin an party chu party nghet leh tlo a nih zel thu sawiin, "Keima tan pawh chona leh phurna nasa lehzual mi siamsaktu a ni. MPC party nuaibo tumtute lakah Pathian kaihhruaina leh PC member rinawm tak takte thawhrimna avangin humhimna nasa tak kan chang. Kan ram leh mipui tan theihtawp chhuahin hmalam panin ke kan pen zel dawn a ni," a ti.

Mizoram dinhmun tlangpui sawiin MPC President chuan, "MNF leh Congress sorkar kalta ten, kum 36 zet min hruai dan leh awp dan han thlir let hian kan ram chu kawng engkimah, ṭhuanawp leh harsatna hnuaiah kan awm mek tih hi tuman kan hai lo ang a, ram himna (security) chungchangahte ramri venhim tur chin kan hre thei lote, ILP a pawpa a sing tel vai an lo lut thei reng a ni. Foreigner Bangladesh ho lah a sang tel tak meuh an lo lut thei reng bawk," a ti a, CAB chu Mizoramah kan hmang lawk ang bera a hriat thu a sawi.

l    India hmarchhak state hrang hranga chengten Citizenship Amendment Bill, 2016 a duh lohna leh dodalna nasa taka kan lantir chung pawha BJP kaihhruai central sorkarin tihhlawhtlin ngei tuma hmalakna a kalpui zui zelnah hian a tuar ber tur Mizoram state huam tel tir ve lo (exempt) tura eptu hrang hrangten sorkar laipui Home Ministry-a memorandum kan theh luh, chak taka bawhzui a, nawr hlawhtling ngei turin Mizoram sorkar kan phut.

l    Tuikukte anmahni duhthu ngei a Mizoram chhuahsana Tripura-a awm hlen duh zawk a, tan an khawh tlatna hi MPC Party chuan awm kan tihpui hle. Hetih ruala Mizoram sorkarin Tuikukte hmakhua ngai a, duhsak taka an hamthatna tur hrang hrang ngaihtuah a, hruaikir ngei tum a an hmalakna pawh hi MPC Party chuan ṭha kan ti hle bawk. Hetihlai vek hian Mizoram sorkarin Tuikukte duh lo chung hruaikir tum a, a hmalak zui zelna erawh hi chu tawp san tawh mai se kan ti hle.

l    Kum 30 chuang state puitling kan nih tawh hnuah pawh kawlphetha siamna remchang leh ṭha tak kan neihte hlamchhiah a nih avanga chhungtin leh mitin mamawh kan la in phuhruk zo lo fo mai hi MPC party chuan vanduaithlak kan ti a, state dang aṭanga lei nan kum tin cheng vaibelchhe 300 vel hmanral a la ngai ziah phei hi chu kan ram hmasawnna ṭhan mawh bawk tak meuh a ni. Heng kan ramin a harsatna lian tak kan tawh sut kian nan leh kan ram dinchhuahna tling leh awmchhun MPC policy leh programme six basic needs hi hlawhtling taka hlenchhuah a nih theih nan MPC party chuan mitin thawhpuiah kan sawm a ni.