Saitualah plastic do nan kawng zawh

Sorkar laipuia Ministry of Housing and Urban Affairs thuchhuak bawhzuiin nimin zing khan Saitualah district bawrhsap C Lalpeksanga hoin plastic hmang lo tura intiamna leh plastic hmanga thil siamte ṭhat lohzia inzirtir nan kawngzawh huaihawt a ni.

Kawngzawh ṭan dawnah Sai­tual DC chuan, Saitual, Keifang, Rûlchàwm, Ruallung leh Sihfa a thianghlima a mawi zawk theihna turin a vawi khat nan plastic dona kawngzawh huaihawt a ni tih a sawi a, "A bul ṭanna chauh a ni. Plastic do hi kan chhunzawm zel tur a ni a, ṭhangthar, zirlai naupangte thinlungah plastic ṭhat lohna kan zirtir zel a, an ṭhan hnan theih nan ṭan lak nasat a ngai," a ti.

Kawng zawhnaah hian Saitual SP PC Lalduhthlanga, Saitual town area-a V/C member te, Saitual College leh Saitual Higher Secondary School-a zirlaite leh thawktu te, sorkar hnathawkte leh tlawmngai pawl dangte an tel a; DC bangla tual aṭanga Keifang dawrkawn thleng kawng zawhin, plastic hmang lo tura intiamna thu an sawi rual a ni.