Sihhmuiah gas bottling plant dah dawn lo Bairabi-ah bun tura hmalak mek a ni
Indian Oil Corporation (IOC) chuan Sihhmuiah gas bottling plant an bun leh dawn lo. Hetih lai hian, IOC chuan Bairabi-ah gas bottling plant din turin hma an la mek.
Vanglaini palai zawhna chhangin Food, Civil Supply & Consumer Affairs (FCSCA) secretary HL Rochungnunga chuan, Sihhmuiah gas bottling plant bun theih a nih dawn loh thu a sawi a, "Bottling plant hi a tirah chuan metric ton 100 dâwl zo tura ruahman a ni a, mahse, rél kawng siam mek avangin metric ton 20-a lian bakin siam theih a ni leh ta lo," a ti.
HL Rochungnunga chuan, rél kawng hnaih taka industry lian bun chu dan hrang hrang avangin tih theih a nih loh thu sawiin, "Metric ton 20 chauh atana bottling plant din chu sorkarin a tê tham deuhah a ngai," a ti a; gas bottling plant lian zawk bun turin Bairabi-ah ruahmanna kalpui a nih thu a sawi.
FCSCA Secretary sawi danin, tun hnaia FCSCA minister K Lalrinliana'n Union minister for Petroleum and Natural Gas Dharmendra Pradhan a kawm ṭumin, Bairabi-a gas bottling plant din chungchang a sawipui. K Lalrinliana thu sawi chu Dharmendra Pradhan chuan ngai pawimawhin, Bairabi chu mithiamte'n an enfiah tur thu leh a hmunhma a ṭhat chuan bottling plant bunna tur lungphùm December 2019 chhunga phùm hman a duh thu a lo hrilh a ni.
Bairabi-a gas bottling plant dinna tur hmuna ruahman chu Guwahati-a IOC mithiamte'n October 24, 2019 khan a hmunah an enfiah a, ṭha thawkhatah an ngai. Chutih laiin, bottling plant atana ram ruahman chhungah mimal leh sorkar department ram eng emaw zat a awm a, chu'ngte chu chinfel phawt a ngai dawn.
Mizorama gas bottling plant awmchhun, Mualkhang Gas Bottling Plant chu ram acre 11.2-a zau a ni a, Bairabi-a bottling plant bun tum chu acre 75-a zau a ni thung. Hei vang hian, ni khata gas pek chhuah theih zat pawh a lêt eng emaw zatin Mualkhang aiin a tam dawn a ni.
Supply Secretary chuan, sorkarin Mizoram chhung ngeia gas bottling plant lian zawk neih a ngaih pawimawh thu sawiin, "Mualkhang a lian tham si lo a, eng emaw harsatna a awmin state páwna awmte chu biakpawh leh thunun an buaithlak ṭhin. Mizoram chhung ngeia awmte chu harsatna a thlen pawhin inbiakpawh zung zung a awlsam dawn a ni," a ti.