Damdawi-in zauh leh tihchangtlun dan tur HFW Board-in an sawiho
Mizoram sorkara Health & Family Welfare Board chu October 24, Ningani khan an chairman Dr R Lalthangliana, Health minister hoin Secretariat Conference Hall-ah an ṭhukhawm a; Aizawl Civil Hospital zauh dan tur leh district hospital-te tihchangtlun dan tur zir chiangtu tur study team din an rél.
HFW Board ṭhukhawm hian October 1, 2019-a hman ṭan Mizoram State Health Care Scheme (MSHCS) kalpui dan leh dinhmunte an thlir a; mipui mamawhna a nasat telh telh avang leh dinhmun harsa zawkte'n an pan ber a nih avangin Aizawl Civil Hospital tihzauh dan tur te, district hospital zawng zawng tihchangtlun dan turte sawihoin, a zir chiang tur study team din an rêl. Study team din tur chu Lengpui Airport-a medical service thuam ṭhat leh tihchangtlun dan tur enfiah tura tih a ni bawk.
Tun dinhmuna Mizoramin harsatna lian tak tak a tawh pathum - HIV/AIDS, Cancer leh damdawi hman khawlohnate chu tun aia uar zawk leh awmze nei zawka do dan tur te, sorkar damdawi-inah upate a thlawn emaw, senso tlem zawk emawa enkawl theih dan tur leh damdawi-ina duat taka enkawl dan tur te, damdawi-in an pan kher ngai loa an awmna hmuna a khát tâwka an hriselna dinhmun enfiahsak ṭhin dan turte an sawiho bawk a ni. Health & Family Welfare Board meeting-ah hian vice chairman Dr ZR Thiamsanga, MLA leh Board member-te bakah, mithiam sawm bikte an tel.