FLAM-in silver jubilee an lâwm

MLA leh MP hluite intèlkhawmna, Former Legislators Association of Mizoram (FLAM) chuan nimin khan Aijal Club-ah an kum 25-na, silver jubilee an lawm a, deputy chief minister Tawnluia'n a hmanpui.

Deputy Chief Minis­ter chuan, FLAM chu inepna leh indáidanna awm lo, inlungrualna leh ṭhahnemngaihna hnuaia ram hmasawnna ngaihtuahna hmun ṭangkai tak a nih thu sawiin, FLAM silver jubilee lawmnaah MLA hmasa berte zinga mi 11 an tel thei chu lawmawm a tih thu a sawi.

Tawnluia chuan, MLA-te chu ram kaihruai tura mipuiin an thlan chhuah an nih avangin, inthlak cháng awm ṭhin mahse ram leh a chhunga mipui hmasawnna tur ngaihtuah chu a pawi­mawh dan a ngai reng tih a sawi a, "Mipui thlan tlin leh mipui aiawh an nih avangin MLA dinhmun hi a zahawm hle a ni," a ti.

Sorkarna chelh tuma inelnaah ram leh mipui hmasawnna atan hmalak leh hnathawh kawnga inelnain hmasawnna a thlen ṭhin tih sawiin Tawnluia chuan, thuneihna leh lalna awh vanga thil ṭha lo pawisak lohna a awm loh nan FLAM member-te chu ngaihtuahna séng ṭhin turin a chah a ni.

FLAM silver jubilee lawmna hi an president KL Rochama'n a kaihruai a, an member thi tawhte sûnna hun an hmang. Mizoram chief minister hmasa ber Ch. Chunga (L) nupui Rothangi hnenah chawimawina thuchei hlan a ni a; FLAM office bearer tur an thlang a, president-ah KL Rochama, vice president-ah P Lalûpa leh treasurer atan K Sang Chhum te thlan nawn an ni.

FLAM hi kum 1994-ah din a ni a, MLA hluite ko khawma a bul ṭantute chu - Dr Kenneth Chawngliana leh TC Pachhunga te an ni. FLAM-ah hian MLA leh MP ni tawhte leh an nupui/pasal thihsan tawhte an tel thei. Tun dinhmunah member 151 awm mekin, pensioner 104 leh family pensioner 47 an ni a; an member zingah mi 84 (MLA 77 leh MP pasarih) an thi tawh a ni.