KHAWTHLIR

Kum 2019-2021 atana YMA Central Executive Committee (CEC) chu nimin khan CYMA Committee Room-ah an ṭhukhawm a, CYMA hnuaia sub-committee 19-a chairman leh secretary turte leh, IGNOU leh CYMA chanchinbu enkawltu turte an ruat. Nimina ruat tharte hi CEC member an ni nghal dawn a, an term erawh kum khat a ni ang. CYMA OB-te chuan a hmain CEC member tur mi 20 an lo ruat tawh a, anni term erawh chu kum hnih a ni. Kumpuan Sub-Committee-ah CYMA vice president an ni ṭhin a, chairman leh secretary dang zawng chu OB leh CEC ruat hmasak zinga tel lo ruat ṭhin an ni.

Nimin khan South Lungpher khuaah 'Sangau RD block level meeting on routine immunization strengthening' buatsaih a ni a, Lawngtlai DC Shashanka Ala-i'n a hmanpui. Sangau RD block chhunga khaw hrang hranga V/C member te, health worker-te leh ASHA-te an tel a ni. DC hian S. Lungphera anganwadi leh sikulte a tlawh nghal a; sikul chei ṭhatna tur leh library dinna atan sikul tinte chu sum pek an nih dawn thu leh primary school leh anganwadi-te hnenah naupang inkhualtelemna bungrua (toys) pek vek a nih tur thu a sawi.

Mizoram Rural Bank Staff Association chuan nimin khan Berawtlanga Convention Centre-ah Biennial General Conference vawi 15-na an hmang. Conference-ah hian chawhmaah an pawl kal zel dan tur an rêl a, agenda pariatte an pawm vek. Chawhnuah kum 2019-21 chhunga office bearer turte an thlang a, president atan C Laldingliana leh general secretary atan HC Lalremruata te an thlang a ni.

Champhaia UDPA department leh GM Higher Secondary School NSS-te chuan nimin khan Swachhata hi Seva hnuaiah plastic hman ṭhat lohna chungchanga inzirtirna Champhai khawpuiah an buatsaih. GM HSS zirlaite chu khawpui chhung hmun hrang hrangah  insem darhin, bawlhhlawhte an thianfai a, dawrkai leh mipui hnenah UDPA hnuaia self help group-te siam paper bag 600 chuang an sem bawk.