Zirlai harsate puitu tur MLF din a ni

M Lalmanzuala, IAS (Rtd.) chuan nimin khan Aizawl Press Club-ah thuthar thehdarhtute a kâwm a; zirlai, chhungkaw dinhmun harsate ṭanpuitu tur leh ṭhangtharte zinga mi hmantlak chher chhuaktu turin Michael Lalmanzuala Foundation (MLF) an din thu a puang. MLF tan hian M Lalmanzuala chuan cheng nuai 10 a pe a ni.

M Lalmanzuala chuan, MLF chu charitable society ni tura din a nih thu a sawi rualin, zirlai rethei leh harsa zawng zawng tan a nih loh thu a sawi, "Pawl 10 zirlai aṭanga graduate chin, mi taima leh ti tak tak peih tur, ram vei mi, retheihna vanga zirna chhunzawm thei lote tan din a ni," a ti a; induhsakna leh dik lo taka naupang ṭanpui tur thlan a nih loh nan MLF Governing Body member 12 te tel lohna selection committee din a nih tur thu a sawi.

Ṭanpuina dawng tur zirlai an thlannaah an uluk dawn thu sawiin Lalmanzuala chuan, "Zirlai ṭanpui tur chu nungchang ṭha an ni tur a ni a, ram leh hnam siamṭhatna atana ngaihtuahna hmang mi an ni bawk tur a ni. Naupang chhungkaw dinhmun leh sum leh pai dinhmunte uluk taka zir chian a ni ang," a ti.

Lalmanzuala chuan, "MLF-in a tum ber chu ram leh hnam tana mi hmantlak leh ṭangkai chher chhuah a ni," a ti a; zirlai ṭanpui ngaite puihna tura sum thawh ve duhte tan SBI, Chaltlang Branch-ah MLF bank account no. 38835043400-ah sum thawh theih a nih thu a sawi.

M Lalmanzuala sawi danin, zirlai graduate chin, lehkha thiam thei tak, merit scholarship hmu, zir zawmna tur sum lama harsatna nei chu an zir zawmna hmun panna tur leh admission fee turte MLF Governing Body-in ṭul a tih angin ṭanpuina a pe dawn a ni.