HFW hnathawh chu mipui tihdam a ni - Health Minister

Health minister Dr R Lalthangliana chuan, Health & Family Welfare department hnathawh chu mipui tihdam a ni a, Isua rawngbawlna nen a inan avangin Health department chu department pawimawh tak a nih thu a sawi.

Eye Care Centre-in kum 20 a tlin lawmnaah khuallian R Lalthangliana chuan thu sawiin, "Health & Family Welfare department hnathawh chu mipui tih dam a nih avangin Isua rawngbawl nen a inang hle a, chuvangin, Health department hi department pawimawh tak a ni. Damlo enkawlna kawngah ṭawngkam ném leh damin damlote chak zawkin hma a sâwntir thei a, ṭawngkam hi fimkhur a pawimawh a, inthlahdah loh a pawimawh a ni," a ti. 

Dr R Lalthangliana hian Eye Care Centre-in mit zaina khawl thar an bun, Centurion Vision System a hawng nghal a; Eye Care Centre-in kum 20 chhung Mizoram mipui tan an thawk a, tunah khawl thar ṭha tak an neih belh leh chu a lawmpui thu sawiin, "Mit enkawlna kawngah Mizoramin bung thar a kai," a ti a; khawlte chu lei mai a har avangin belh­chian dâwl leh ṭangkai thei ang ber lei a ṭul tih a sawi bawk.