Serchhip Leisekawt Field zauh hna ṭan

Kum 2020-a KṬP General Conference nghahna tur Serchhip khawpui laili, P&E Venga Leisekawt khelmual chu laih zauh a ni dawn a; nimin khan minister of state Robert Romawia Royte-in khelmual zauh bul ṭanna hun hmanpuiin, bawngtuthlawha lei chêkin bul a ṭan.

Robert Romawia chuan, Leisekawt khelmual zauh hna ṭan a ni ta chu lawmawm a tih thu sawiin, "Field laih zauhin a tihchhiat tur BDO staff quarters thar pariat sakna tur cheng nuai 372 dah a ni tawh a, khelmual laih nan cheng nuai 195 dah a ni," a ti.

KṬP General Conference 2020 Organising Committee chairman Upa Vanlalchhunga pawhin thu sawiin, Leisekawt Field laih zauh chu KṬP conference Organising Committee duh dan leh dil vang ngawt a ni lo a, Serchhipa NGO Coordination Committee duh dan leh dil a nih thu a sawi a, "KṬP General Conference chuan a zár a zo ve dawn a ni," a ti a; an beisei ang takin sorkarin a hun takah kut a thlak hman tur chu an lawm hle thu a sawi.