HS Games champion - Aizawl district
Mizoram Secondary School Games (HS Games) vawi 37-na, Kolasib-a buatsaih chu nimin khan zawh a ni a, a khârna inkhawm chu minister of state K Lalrinliana'n hmanpuiin, lawmmante a sem. He intihsiaknaah hian Aizawl district an champion a ni.
K Lalrinliana chuan, Kolasib-ah Mizoram HS Games hlawhtling taka zawh a ni chu thil chhinchhiah tlak tak a nih thu sawiin, district hrang hrang aṭanga zirlai kal khawmte tan inṭhian ṭhatna leh inunauna petu leh zirna kawnga hmasawnna thlentu ni se a duh thu a sawi.
Mizoram sorkarin zirna leh infiamna a ngaih pawimawh thu sawiin, Kolasib Saidanah zirlai infiamna lama tuite tan naupang 100 awm theihna tur SAI centre ruahman mek a nih thu sawiin, infiamna lama tui zirlaite chu hmang ṭangkai turin a chah. Khualzahawm Zoengsanga, Kolasib bawrhsap pawhin thu sawiin, zirlaite chu zirna kawngah tum mumal neia kal tur leh infiamna chu zirna tibahlah lo záwnga kalpui turin a chah bawk.
October 22-a ṭan Mizoram Secondary School Games-ah hian infiamna hlawm paruk - athletics, football, volleyball, hockey, judo leh boxing-ahte zirlaite an intihsiak a; gold medal 13, silver 11 leh bronze 10 latu Aizawl district an champion. Pahnihna Lunglei district-in gold 13, silver 2 leh bronze 12 an la a; pathumna Serchhip district-in gold 6, silver 6 leh bronze 6 an la thung.