SHC-ah kohhran zah tak chungin Kan campaign mek - Congress party

Mizoram Pradesh Congress Committee (MPCC) chuan thu­chhuah siamin, Sinlung Hills Council (SHC) chu Congress party-in an ngaih pawimawh thu leh sorkar nghet a din theih nan chuan SHC inthlanpui awm turah kohhran zah tak chunga an campaign mek thu an tarlang.

MPCC chuan, SHC huam chhungah rálthuamte chelekin, thisen tam tak a luang tawh a, hmasawnna an hmuh tur ang pawh an hmu lo nasa ṭhin tih sawiin, "Kum 30 zet Sinlung hills-ah hian remna a awm theih loh hnuah Congress kaihhruai sorkar leh Hmar mipui hmalaknain April 2, 2018 khan HPC(D) nen inremna ziah a ni a, SHC a lo piang ta a ni," an ti a; Congress sorkar hmalakna avangin New Capital Complex-ah SHC office cheng nuai 272 sênga sak zawh tawh a nih thu an sawi.

Sinlung hills an ngai pawimawh tih sawiin MPCC chuan, "Congress kaihhruaina hnuaiah party rilru dahṭhain, interim term atan SHC hruaitu ruat a ni a, tluang taka a kal laiin, MNF sorkar thar hnuaiah an duhsak zawngte dah lutin, nasa taka sîksâwi a ni. SHC piang tîrin a mamawh ber chu - MNF-in duh duha a thunun theih loh sorkar, democratic principle-a din sorkar nghet siam a ni a, sorkar nghet a din theih nan inthlan awm turah MPCC hruaitute chu pawl dangte nena thawhhona tibuai lo leh kohhran zah tak chungin an campaign mek a ni," an ti.

Congress party chuan, SHC inthlan atana campaign chu thawh hnihah an ṭhen a, a thawh khatna zo tawhin, a thawh hnihna chu October 28, 2019-ah an ṭan leh dawn thu an sawi a; November 5-a inthlanah mipuite chu rilru fím taka vote thlak tura chahin, induhsak leh invaunain ro a rêlna sorkar a pian loh nan, remna thlen ṭhintu Congress party leh an thawhpuite thlang turin SHC mipui an ngen a ni.