Industrial Development Board ṭhu

Mizoram sorkar Indus­trial Development Board chu nimin khan an chairman Dr R Lalthangliana, Commerce and Industries minister hoin Secretariat Conference Hall-ah an ṭhu a; Mizoram Industrial Policy (MIP) ennawn chungchang leh agenda dangte an ngaihtuah.

Meeting-ah hian Industrial Development Board kaltlanga SEDP ṭanpuina dawngtu tur thlanna dan inkaihhruaina (criteria) thlirho a ni a; hna leh eizawnna dil theih, mimal thiamna neite tana SEDP hnuaia trade hrang hrang dil theihte rawt niin, a thuphungin an pawm.

SEDP hnuaia Commerce & Industries aṭanga trade thlan theih tura rawtte chu - carpentry, puanṭhui, beauticulture, lu meh, dawr siam (grocery/petty shop), thingpui dawr, thirdéng, pheikhawk siam, electronic repairing, two wheeler workshop, automobile workshop, steel fabrication, alluminium work, puantah leh micro enterprise -te a ni.