MNF sorkar hnuah advertisement chhuah loin RMSA leh SSA-ah mi 91 lak an ni tawh - MPCC

MPCC Media dept. hruaitute chuan Inrinni khan Congress Bhavan-ah thuthar thehdarhtute kawmin, an chairman Lallian­chhunga chuan December, 2018 aṭanga September, 2019 chhungin advertisement chhuah loin SSA leh RMSA-ah mi 91 lak an nih tawh thu sawiin, "Heng zinga 36 chu SSA hnuaia lak an ni a, 55 chu RMSA hnuaia lak an ni. Thawktu lak tam zawk hi Education minister Lal­chhandama Ralte-in a mi duhsak zawngte a thun an ni," a ti.

Lallianchhunga chuan ad­vertis­ement chhuah loin SSA leh RMSA khaikhawmtu Samagra Shiksha-in RTI Act hmanga zawhna an chhanna aṭanga an hriat a nih thu sawiin, "RTI chhanna aṭanga a lan danin SSA hnuaiah December, 2018 aṭanga September, 2019 chhung hian advertisement chhuah thlapa hnathawktu lak an awm lo," an ti a, SSA hnuaia thawktu lak thar 36 zinga 16 chu an permanent post-a awm loin hmun danga attach nghal an nih thu a sawi.

Lallianchhunga sawi danin, advertisement chhuah lo a hna­thawk­tu lak a nihna chhan zawhna chu, 'Recruitment Rules (RR) kan neih loh avangin' tia chhan a ni. Advertisement chhuah loa thawktu lakte chu Rs. 20,000 hlawh tur health physical instructor pariat, Rs, 20,000 hlawh tur art education instructor pali, resource person pasarih leh primary school teacher 17 an ni. 

SSA-a advertisement chhuah lo a hnathawktu 36 lakte hlawhah hian kum khatah Rs. 10,080,000 a kal ral dawn a ni. Tin, SSA Mis­sion hnuaiah hian MNF sorkar aṭangin hnathawktu 49 transfer an ni tawh. RMSA hnuaiah chuan December 2018 aṭanga September 2019 chhung hian RMSA hnuaiah hnathawktu 87 lak an ni tawh a, heng zinga 32-te chu advertisement chhuah hnua lak an ni a, a bak 55 chu advertisement chhuah loa lak an ni thung. 

An zingah hian IV Grade pakhat tih loh chu High School leh HSS zirtirtu vek an ni. IV grade hian thla khatah Rs. 9,000 a hlawh a, high school zirtirtuten Rs. 27,000 hlawhin, HSS zirtirtu atana lakten Rs.30,000 an hlawh.

RMSA hnuaia advertisement chhuah lo a hnathawktu lakte hlawhah hian kum khatah Rs. 17,892,000 a kal ral dawn a, SSA hnuaia lakte nen phei chuan kum khatah Rs. 27,972,000 a kal ral dawn a ni.

Zawhna chhangin Lallianchhunga chuan zirtirtu ni lo, thawktu dang zawng chu management cost aṭanga hlawh pek tur an nih thu sawiin, "Management cost-a hmanna tur mamawh awm sa kha a ei hek vek dawn a ni. Management cost hman dan tur kalphung a tidanglam vek dawn a ni ber mai. Management cost 4.5% hi paper, electric, tui, motor hire na, YMA nen a thawhhona, media hmalakna etc a hman tur a ni a, chuvangin heta ṭanga hlawh la tur appointment an pek ṭeuh avangin official ho an mangang hle," a ti.

MPCC chuan tun hnaiah MNF sorkar chuan MR-a thawk tur primary school leh middle school zirtirtu 881 lak an nih thu sawiin, "Education Minister-in dik taka lak niin sawi mah se, anmahni party hruaitute leh party mipuite ngeiin an rin zawh loh avangin Hnam Run aṭangin zirtirtu lakna chu ennawn tir leh a ni. Advertisement chhuah theih reng a nih lai a, hetiang mai mai a hnathawktu la duhtu Education Minister hian dikna a duh tak tak lo tih a chiangin, MNF party hotute leh an party mipuiten Education Minister an ring zo lo hi a lo awm hle," a ti.

•    Advertisement chhuah loin SSA hnuaiah thawktu 36 lak an ni

•    RMSA hnuaiah advertisement chhuah loin thawktu 55 lak an ni

•    MNF sorkar hnuah SSA hnuaia hnathawktu 49 an transfer tawh

•    MNF-in Education Minister an ring zo lo