Governor thar tur PS Sreedharan Pillai

Mi­zo­ram governor thar atan Kerela BJP president PS Sreedharan Pillai (66) ruat a ni. 

President Ram Nath Kovind chuan tun hnai khan India ram state ṭhenkhat governor turte hming hi tichhuak a ni. Kerela BJP president hlui tho Kummanam Rajasekharan-in Mizoram governor nihna March, 2019-a a bansan hnuah Mizoram chuan governor nghet a nei lo. March 9, 2019 khan Assam governor Prof. Jagdish Mukhi chu Mizoram governor hna hmui tura lakluh a ni.

Hun eng emaw chen Mizo­ramin governor nghet a neih loh hnuah governor nghet a nei leh dawn ta a ni. PS Sreedharan Pillai hi Mizoram governor 20-na tur a ni. The Times of India-in a tarlan danin, PS Sreedharan Pillai hian Mizoram governor thar atana ruat a nihna hi a pawm dawn thu leh a mawhphurhna chu ṭha taka a hlen theih a beisei thu a sawi a ni.

PS Sreedharan Pillai hi December 1, 1953 khan a piang a, kum 2003-2006 chhung Kerela BJP president a ni a, hun eng emaw chen a nih loh hnuah kum 2018 khan Mizoram governor hlui Kummanam Rajase­kharan thlakin BJP president hna hi a chelh leh a ni.

Mizoram hian union territory a nih chhung kum 1972 aṭanga 1986 thleng khan lieutenant governor panga a nei a, state a nih hnu kum 1987 aṭangin governor 19 a nei tawh. Mizoram governor 20-na tur PS Sreedharan Pillai hi Mizoramin Kerala mi governor pathum a neihna tur a ni a, a hmain Kummanam Rajasekharan leh  Vak­kom Purushothaman-te governor an lo ni tawh.