KHAWTHLIR

Inrinni khan Republic Veng Branch KṬP-te'n Aizawl Civil Hospital tan thisen unit 51an pe a, a petute mipa 43 leh hmeichhia pariat an ni a; Chaltlang South Branch KṬP pawhin Synod Hospital tan thisen unit 30 an pe a, petute mipa 26 leh hmeichhia pali an ni. Thingsulthliah Branch KṬP chuan October 25, Zirtawpni khan Aizawl Civil Hospital tan thisen unit 58 an pe a, a petute mipa 53 leh hmeichhia panga an ni.

Tripura refugee camp-a Bru-te Mizorama hruaikir hna thawh meka Lung­lei district-a awm tur chhungkaw 20-a mi 81 te chuan October 25, 2019 zan khan Lunglei an thleng. Lunglei aṭanga thudawn danin, Bru-te hian zan dar 10:30 velah an riahna hmun tur Luang­muala 2nd Bn. MAP Hqrs., an thlenga DC K Lalrinzuali hoin official-te'n an lo hmuak a ni. K Lal­rin­zuali chuan Bru hruaikir chu sorkarin a ngaihpawimawh thu leh an chawlh lawkna leh an in sakna tur hmun house plan site te pawh mumal taka ruahman a nih thu a sawi.

North Vanlaiphai bul Tuiphai luiah he luia la awm ngai lo sangha chi khat Nghachi chu tun­hnai khan chhuah a ni. Tuiphai lui dunga sangha leh nungchate hi kum 10 chuang kal ta aṭang khan North Vanlaiphai Venglai Branch YMA in an humhalh a ni.

National Trade Union of Mizoram (NTUM) hnuaia thuneitu sang, Central Working Committee tun hnaia Synod conference hall-a ṭhukhawm chuan Mizoram sorkar hnuaia muster roll-te'n hamṭhatna tam zawk an hmuh zel theih nan chak lehzuala hmalak an rel. NTUM Secretary report aṭanga alan danin tunah hian Mizoram sorkar hnuaia department hrang hrangah MR hnathawk 10,000 chuang an awm a ni. 

UPC- North East India, Aizawl East District Missions Department inkhawmpui vawi 26-na October 25, 2019 zan aṭanga Thingsulthliah playground aṭanga neih ṭan chu nimin khan a ṭiak. Khawmpuiah hian thupui thlan bik siam a ni a, mi hrang hrangin Pathian thuchah an sawi a ni. Report bu aṭanga a lan danin Aizawl East District UPC-ah hian pastor bial 30 awmin heng bial hrang hrangah hian kumin chhungin Missions department-te hian rawngbawltu, home missionary mi 16 a enkawl a, heng mite rawngbawlna aṭang hian kohhranah mithar  60 chuang sengluh tawh a ni.