Vanglaini logo

Mizoramah agriculture tih hmasawnna atan Organic farming uar tum a ni - Agriculture Minister

Agriculture minister C Lalrinsanga chuan agriculture tih hmasawnna atan Mizoramah organic farming uar taka kalpui tum a nih thu a sawi. Lunglei West bialtu MLA C Lalrinsanga chuan October 25 leh 26 chhunga a bial chhung khaw hrang hrang a tlawhnaahte thu a sawi.

Agriculture Minister chuan agriculture lama Mizoramin hma a sawn theihna atan theih­tawp an chhuah tih sawiin, "Agriculture tih hmasawnna atan hian Mizoramah organic farming uar taka kalpui tum a ni. Kuthnathawktute tana sorkar laipui scheme pawimawh tak tak kuthnathawktute pension scheme PM-KMY leh thlai insurance scheme PMFBY-te pawh Mizoramah kalpui mek a ni," a ti a, UNDP hnuaia Global Environment Facility leh sorkar laipui hnuaia Rainfed Area Development-te pawh kalpui zel tum anih thu a a sawi.

Hmasawnna atan inkal­pawhna kawngpui ṭha siam a ngaihpawimawh thu sawiin C Lalrinsanga chuan, "Lunglei aṭanga Buarpui kawng hi intermediate lane-a ruahman niin kum 2022-ah zawh fel tum a ni a, kuthnathawktute thlai thar phurh chhuah leh sumdawnna atana kawng pawimawh tak ni tura ruahman mek a ni," a ti.

C Lalrinsanga hian Buarpui khaw tana tui lakna thar ruahman mek Buarpui Water Supply Scheme chu a hmunah kalin a enfiah a ni.  Buarpui Water Supply Scheme hi Buarpui khaw intin tana tui pekna tur cheng nuai 400 senga ruahman niin ni zung (solar) chakna hmang ṭangkaia Lungphun lui tui pump chhuah tum a ni. 

Minister chuan Buarpui Water Supply Scheme chu kumin chhung ngeia zawhfel anih theih nana department hnathawktute ruahmanna siam puiin, bawhzui ngaite bawhzui vat a tum thu a hrilh a ni. Hmasawnna mamawh hrang hrang mipuiten a hnena an lo thlente tih hlawhtlin a tum thu sawiin C Lalrinsanga chuan, sorkar hmalaknaahte thurawn pe fo ṭhin tur turin a chah.

C Lalrinsanga hian  Sazai­kawn,­ Vanhne, Thuampui, Lung­dai S, Serte, Sertlangpui, Kawl­hawk, Buarpui leh W Bung­tlangte a tlawh a, Lunglei addl. DC David Liansanglura Pachuau, Lunglei DAO Tlang­timawia ZoteARCS Lunglei H Lalnuntluanga leh official dangte'n an ṭawiawm a ni.