Ni 150 inhlawhtir kan tum - RD Minister

Lalruatkima chuan sorkarah sum harsat chang awm ṭhin mah se, RD dept. hnuaiah chuan sum harsat a awm ve loh thu sawiin, "Ni hnih thum lek kalta khan RD dept. aṭangin cheng vbc. 52 sem chhuah a ni. Development tihlawhtling theitu Pu Zorama kaihhruai sorkar hnuaiah hian RD-ah pawisa awm loh a awm ve lo," a ti a, state sorkar sum hatsatna an tih pawh an department-ah chuan hlauh tur a awm loh thu a sawi.

Sorkar hmasa hun lai khan MNREGA hnuaiah thingtlang mipuite chu ni 50-60 te chauh inhlawhna siamsak an nih ṭhin thu sawiin Lalruatkima chuan, "Assembly House-ahte kan aupui ṭhin a nih kha. Tunah chuan 100% tlin tumin hma kan la zel a, sorkar kum chanve vel hun ka la neih chhung hian a theih anga tam tihhlawhtlin kan tum a ni," a ti.

RD Minister sawi danin, mirethei in sakna - PMAY (Gramin) pawh sorkar hmasa pek chhunzawm theih tawh loh, kum 2016-2017 atan 2nd installment cheng vbc. 29 chu tunhnaiah hmuh a ni a, beneficiary 2405-ten PMAY (G) Housing for All an dawng thei dawn a ni. Beneficiary awmsate nen beneficiary 4000 tan central sorkar chuan an dilna a pawmsak a ni.

Thingtlang hmasawnna bakah tunhnai lawk khan sorkar hmasa hunlai kum 2017 daih tawha 10% sanction hmuh tawh, fund hmuh chhunzawm loh Lianchhiari Run (multi facility centre) sakna tur chu Ministry of Culture, NEC - DoNER-te theihtawp chhuahin an dawr hnuah cheng nuai 260 sanction a nih thu Lalruatkima chuan a sawi bawk.