Bus service chungchang Manipur CM sawipui

Transport minister TJ Lalnuntluanga chuan October 10, 2019 khan Aizawl leh Churachandpur (Lamka) inkara MST Bus Service tir chungchang Manipur chief minister N Biren Singh a sawipui.

MNF thuchhuah tarlan danin, Biren Singh hian Aizawl leh Churachandpur inkara bus a service theihna atana a ṭul anga hma la turin Manipur sorkara official-te a hrilh nghal a ni. CM a kawm zawh hian Transport Minister hian Churachandpur-a MST bus station tur a enfiah nghal a ni.

TJ Lalnuntluanga hian Mizo Peoples Convention (MPC) pisa-ah Manipur-a Mizo NGO hruaitute a kawm nghal a, Zofate luah chin rama Zofate chu Mizoram sorkarin a hriat reng thu sawiin, "Lamka-a Zohnahthlakte pawh hi kan hrereng che u tih in hriat ka duh. Mizoram sorkar chuan hnam inpumkhatna atan kan theihtawpin hma kan la mek zel a ni," a ti.

Chief Minister-in Zohnahthlakte inkal­pawhna ṭha neih leh inpumkhatna a ngaih pawimawh thu sawiin, "Hemi atana hmalakna bus service-tir pawh hi CM chuan ṭha a ti hle a, Bus leina tur pawh phal takin min ruahmansak a ni," a ti.