Per capita income sang ber nih hun tur Congress ṭhalaite'n sorkar zâwt

Congress ṭhalaite chuan, chief minister Zoram­thanga'n, 'SEDP hmangin Mizoram chu India ram puma hmasawnna lama ṭhang chak ber leh mi tin sum lak luh chawhrual (per capita income) sang ber ni tura ṭan lak a ni ang' a tih chu engtika thleng tura beisei chi nge tih MNF sorkar an zawt.

MPYCC chuan thu­chhuah siamin, kum 2018-a Assembly inthlan dawna MNF president Zoramthanga leh a hote campaign auhla ber chu SEDP a ni tih an tarlang a, "Chhung tinin cheng nuai 3 an dawn tur thu te, NLUP dawng tawh pawhin an dawn vek tur thute hmun hrang hrangah vawi duailo tlangaupui a ni. Hetih laia party vice president leh Policies & Programme Committee chairman Dr R Lalthangliana SEDP sawi dan nen a inmil tlat lo kha mak kan ti a ni," an ti.

Congress ṭhalai chuan, SEDP kalpui nan kum 2019-20 chhungah cheng vbc. 750 dah a nih laiin, district tihchangtlunna atan te, doctor leh nurse post ruak hnawhkhah nan te, zirtirtu indaih loh hnawhkhah nan te, kawng siam nan te, sport lam atan leh a dang atante ruahman a ni ta daih niin an sawi a, "Cheng nuai thum sem leh chhung tin fairèl bél lam a hawi ta miah lo," an ti. SEDP dawn beiseia MNF vote-tute MNF sorkarah an beidawng ṭan tih an sawi rualin, SEDP beiseitute tibeidawng lo turin MNF sorkar an phût.

Kum 2020-21 atan SEDP-a cheng vbc. 513 dah chu kum hmasa aiin vbc. 237-in a tlem zawk tih sawiin MPYCC chuan, "Central sorkara an rin­chhan ber leh an hlauhtlawn­ BJP sorkar sum harsat vanga vuak dûp hleih theih loh vanga tihtlem a ni nge?" an ti a; SEDP chung­changa thu inhmuh loh vanga MNF vice president aṭanga Dr R Lalthangliana paih a nih leh nih loh an zawt bawk.