Congress sorkar laia dan siam hmangin Thawktu 91 lak a ni - Education Minister

MZP-in nimina Dawrpui Mul­tipurpose Centre-a Zirlaite Ni an hmannaah thu sawiin Edu­cation Minister chuan, zirlaite ngaih pawimawh avanga an thil tih politics thila mipui hruai kawi tumna atana hman tum an awm niin a sawi a, "MPCC Media department-te khan he hna lak dan hi zir chiangin, an sorkar laia an Education Minister leh Parliamentary Secretary-te kha zawt chiang hman se thuthar theh­darhtute an kâwmin ka ring lo," a ti a; MPCC Media-te chuan an mawng an hlim nia a hriat thu a sawi.

Lalchhandama Ralte chuan thawktu 91 an lakte chu post thar siam ni loin, casual post (thihna, hna dang hmuh vang, etc.-a post ruak awm) a nih thu sawiin, "Kan sorkar hnuah pawh RMSA hnuaiah high school kan din thar a, chuta zirtirtu tur chu post thar a nih avangin advertisement chhuah thlapin kan la. Casual post bikah hi chuan mamawhna hriain SSA Executive Council chuan February 13, 2015 khan advertisment chhuah kher loa zirtirtu lakna dan a siam a ni. Sikulin an mamawhna a sang si a, advertisment chhuah chuan hun a duh rei dawn a ni," a ti.

School Education Minister chuan, February 13, 2015-a dan siam hmang hian Congress pawhin an sorkar laiin zirtirtu eng emaw zat an la nia sawiin, "Hna nghet a ni lo a, zirlaite'n zirtirtu an mamawh si avangin àwm kan tihpui a, mi 100 chuang an la a, sawisel enah pawh kan en lo. An sorkar lo ta chêng a, an dan siam hmangin zirtirtu kan la a, an sawisel leh si. An hmanrua hman ang kan hmang ve mai a ni," a ti a; MPCC Media department-te chu thil an tisual palha a ngaih thu a sawi.

Khawtlang hruaitute'n casual post ruak a tam avangin zirtirtu an mamawh thu a hnena an thlen nasat thu sawiin Lalchhandama chuan, "Ṭhenkhat chuan an MLA-te leh minister nèl zawngte an rawn ruai a ni. Khawtlang hruaitute chu zirtirtu tur qualify ngei an hriat chuan rawn dìltir turin kan ti a, an hmuh chuan an rawn dil ṭhin. Education Minister-in a duhsak zawng a la lo a, khawtlang hruaitute'n zirtirtu tur an hmuh chuan mamawhna a san avangin SPD hnenah ka ziahsak mai a ni. Ka laktir tumah an awm lo," a ti.

Education Minister chuan, khaw ṭhenkhat, an khaw high school-a mathematics zirtirtu tur hmu zo lo an la awm thu sawiin, "High school-a mathematics zirtir tura qualify (tling) in awm chuan lo kal rawh u, sikul mamawh an awm che u," a ti a; high school-a mathematics zirtir tura qualify inhriattir an awm a nih chuan Congress sorkar hun laia dan siam hmanga lak an nih tur thu a sawi.