Drug Testing Laboratory lungphùm phúm a ni

Health & Family Welfare minister Dr R Lalthangliana chuan nimin khan New Capital Complex-a Mizoram State Drug Testing Laboratory sakna tur lungphùm a phúm.

Lungphûm puala inkhawmah Health Minister chuan, Drug Testing Laboratory chu Mizoram tan a hlu hle dawn tih sawiin, "Khawvel a changkan ang zelin Mizote pawhin ei leh in kan ulukin kan fimkhur sâwt hle a, damdawi ei chungchangah pawh kan fimkhur sâwt hle. Sorkar laipui pawhin damdawi 

ṭha leh ṭha lo hriatna tur Drug Testing Laboratory siam a ngai pawimawh a ni," a ti. Dr R Lalthangliana chuan, damdawi siamtu company lâr leh ṭha tak tak nia hriatte pawh an damdawi siam chhuah a him leh him loh endik a ṭul cháng a awm tih sawiin, "Ei leh in tur Mizorama kan siam chhuahte leh Mizoram páwn aṭanga kan lak luhte pawh a him leh him loh awlsam tak leh rang takin kan hre zung zung thei tawh dawn a, Guwahati-a sample thawna hun eng emaw chen a result nghah ngai ṭhin kha kan pumpelh thei dawn tawh a ni," a ti a; damdawi bakah, ei leh inte a zavaia endik a harsa a nih pawhin, rinhlelhawmte chu Mizo­ramah enfiah vek theih tum a nih thu a sawi.

Drug Testing Laboratory hi cheng nuai 300 senga sak tur a ni a, a satu tur chu Mizoram Technocrats Company Pvt. Ltd. niin, thla 18 chhunga sak zawh tur a ni.