MZP-in Zirlaite Ni an hmang

Mizo Zirlai Pawl (MZP) MZP chuan nimin khan Aizawl leh khaw dang ṭhenkhatah Zirlaite Ni, MZP din champha ni bawk an lâwm. Aizawlah chuan Dawrpui Multipurpose Hall-ah an hmang a, School Education Minister Lalchhandama Ralte-in a hmanpui.

Lalchhandama Ralte chuan, zirlaite tan Zirlaite Ni chu a hlut thu leh hman thiam a ngaih thu sawiin, "Zirlaite Ni hi kum dangah chuan Mizorama sikul zawng zawngin kan hman theih nan ruahmanna felfai zawk sorkarin a siam dawn. Mizo mipuite thinlungah hmun pawimawh ber an chan a ṭul tak zet a, nu leh pate hian zirlaite aia dah pawimawh kan nei tur a ni lo," a ti a; zirlaite chu ram mamawh chhànna ni tur leh tumruhna, taimakna, teirei peihna nei turin a chah.

Aizawla Zirlaite Ni hmanna inkhawm hi MZP vice president Vanlaltána'n a kaihruai a; MZP president L Ramdinliana Renthlei pawhin thu sawiin, "October 27, Zirlaite Nia min puansaktu Mizoram sorkar chungah kan lawm tak zet. Vawiina zirlaite hian naktuka zirlai lo awm turte tan mawh kan phur a, kan tu leh fate chenna tlak ram nuam hnutchhiah turin ṭan ila thar sauh sauh ang u," a ti.

MZP Headquarters, Lunglei chuan Zirlaite Ni hmangin, KK Home, Lunglei Chanmari-ah ṭanpuina an hlan a; KK Home-a zirlaite nen hun an hmangho nghal. Lunglei MZP hian KK Home-ah hian buhfai ip hnih leh frooti ṭhahnem tak a hlân a ni.

MZP hi October 27, 1935-ah din a ni a, MZP din ní hi Zirlaite Ni atan hman a ni ṭhin. October 27 hi kuminah chuan Pathianni a nih avangin, MZP chuan nimin khan an hmang a ni.