AH & Vety dept.-in ruahmanna an siam

AH & Vety dept. chun vawk natna PRRS chungchangah leh hun­pui lo thleng turah mipuiten vawk hrisel ṭha kan ei theih nana zawm tur hrang hrangte thuchhuah siamin a tarlang.

AH & Vety dept. chuan Mizoramah PRRS leh African Swine Fever (ASF) a lo luh loh nan leh vawk vulha eizawngtute hmakhaw ngaia an hamṭhatna tur rilrua ngaih­tuah chunga ram dang aṭanga vawk lakluh khapna hun eng emaw ti chhung kalpui mek chu mipuite'n ṭha taka an zawm avangin tun thlengin Mizoramah PRRS leh ASF te a la leng lo tih tarlangin, "Min ṭawiawmtute zawng zawng chungah lawm­thu kan sawi a ni," an ti.

•    Ram dang - Myanmar, Bangladesh, etc. aṭanga vawk leh vawksa aṭanga ei tur siam chi hrang hrangte chu khauh leh khawng taka khap chhunzawm zel a ni.

•    India ram state dang, PRRS leh ASF len lohna hmun aṭang chauhin vawk hi lakluh phal a ni. A lalut turte chuan a hnuaia tarlante hi an zawm tur a ni:

        a) Director, Commerce & Industries hnen aṭanga vawk lakluh phalna dil tur reng rengin AH & Veterinary Director remtihna an la hmasa tur a ni.

        b) Vawk puitling talh tur chi chauh lakluh phal a ni.

        c) Vawk lalut turte hian an lakna/leina tur farm aṭangin Proper Soundness Certificate, Registered Vety Practitioner siam an nei ngei tur a ni.

        d) Vawk lalut reng rengin AH & Vety department check gate-ah an document-te an endik tirin, an vawk lakluhte hriselna an exam tir leh ngei ngei tur a ni.

        e) Vawk lalut reng rengin an lakluh zat leh lakluh ni chiang taka ziakin AH & Vety Director hnenah an hriattir ziah tur a ni.

•    He ruahmanna hian official Gazette-a chhuah a nih aṭanga January ni 31, 2020 thleng a huam ang.