KHAWTHLIR

Champhai College hall-ah nimin khan chawlhkar khat awh tur 'Recent Advances in Academics' (RAA 2019) tih thupui hmangin international workshop buatsaih ṭan a ni a, Mizoram University vice chancellor Prof. KRS Sambasiva Rao-a'n a hawng. Workshop hi RUSA 2.0 Equity Intiatives Fund bultumin Champhai College IQAC-in an buatsaih a ni a, India leh Myanmar aṭangin mithiamte eng emaw zat an tel a, tunlai thiamna hmanga zirna hmasawn dante an zir dawn a ni.

Khawzawl district-a Power & Electricity department-a thawkte tan nimin khan Khawzawl Electric Veng YMA Hall-ah 'Energy conservation and electrical safety' tih thupui zirhona buatsaih a ni. Seminar hi electrical inspector Laldawngliana'n a kaihruai a, mithiamte'n thupui hrang hrang an zirtir. Khawzawl district-a Power & ELectricity staff 160 chuang an tel a ni.

Nimin chawhnu dar 1 vel khan Chaltlang Lily Venga C Lalnunhlimi in, concrete building, chhungkaw pahnih - Lalnunsanga leh Lalhmingsanga Hmar te chhungkaw luah lai chu bungrua chuh hman lohin a kâng ral. In a kang tih hriat a nih velah a bul hnaia awmte'n an ṭhelh nghal a, Fire department-te nen ṭangkawpin hmun dang a kan kai zel hmain an ṭhelh hman a ni. Kângmei tuartu building colony-a awmte chu chhuahtir vek niin, Lily Veng Branch YMA-in zanriah an buatsaihsak a, an riahna tur hmun pawh an ruahmansak nghal. In kanna hmun hi bialtu MLA Vanlalhlana chuan tlawhin ṭanpuina Lily Branch YMA-te hnenah Rs. 5,000 a hlan.

Mizoram governor atana ruat thar PS Sreedharan Pillai chuan November 4, 2019 hian Aizawl rawn thlen a tum a, ruahman dan chuan a tuk November 5 ah Mizoram larsap atan Raj Bhavan-ah Gauhati High Court Chief Justice emaw a aiawhin rinawmna thu tiam tirin an la lut ang.