Mizo nationalism-ah kan piang a, Kan thihpui tur a ni - Tawnluia

MNF senior vice president Tawnluia, Mizoram sorkara deputy chief minister ni bawk chuan nimin khan an party pisa, Mizo Hnam Rûna inkhawmah thu sawiin, "Mizo nationalism-ah kan piang a, kan nung a, kan thihpui tur a ni," a ti.

Tawnluia chuan, MNF sorkar piang chu Pathianin a ruat a ni tih sawiin, "Mahni tan ni lo, ram leh mipui tan i thawk hmasa zawk ang u. Lalpa min pek sorkar hi Lalpa ráwn chung zela enkawlin, neitu thinlung puin i thawk zel ang u. Mizo nationalism hi kan kalsan thiang lo a, i tichak zual sauh sauh ang u. Nationalism spirit tihchak deuh deuh hi kan tih tur a ni," a ti a; party dangte awm ve mah se, nationalism thinlung kengkawhtute chu a ram neitu dik chu an nih thu leh lalna leh thuneihna, sum leh pai ringawt ûma kal ve thiang an ni lo tih a sawi.

Pathianin a rawngbawl tur leh Zoram mipui rawngbawl turin chakna leh damna a pe tih sawiin Tawnluia chuan, "Ama thu loa ke pên ngam tur kan ni lo. Ka dam loh chhung zawng khan ṭawngṭaina tam tak ka dawn avanga Lalpa tihdam ka ni," a ti a; chief minister Zoramthanga kaihhruaina hnuaiah Pathianin MNF-te chu Zoram mipui rawngbawl turin mawhphurhna a pe tih sawiin, lungrual taka thawkho turin an party mite a sáwm.

Deputy Chief Minister chuan, a department-ah pawh theihtawpin hma an la a, an manifesto tihhlawhtlin an nei nual tawh tih sawiin, "Sorkar hian nasa takin hna a thawk a, lang tawh, lang mek leh la lang zel turte pawh a awm," a ti. "Aizawl khawpuiah kawng kawi ulh deuh hmun 10 velah Krismas hmaa siamṭha turin kan ruahman fel tawh. District thar pathumah phûl lem phah turin kan ruahman fel tawh. Aizawla tui harsatna tih ziaawm nan Ṭawi tlang tui cheng vbc. 114 sêngin kan la ang a, kan sorkar hnua sanction kan hmuh liau liau a ni," a ti bawk.