State pumah State Day lawm
Nimin February 20 kha India danpui hnuaia Mizoramin state anga inrêlbawlna a neih ṭan ni, Mizoram State Day a ni. State Day vawi 34-na hi Mizorama district tinah sorkar bultumin lawm a ni a, Aizawlah chuan Vanapa Hall-ah lawm niin, Governor PS Shreedharan Pillai leh chief minister Zoramthanga ten an hmanpui.
Governor chuan, mipui tawrhna nasa tak karah ṭan rualna vanga Mizoramin state dinhmun a nei chu lawmawm a tih thu sawiin, "Kan state hlawhtlinna aṭanga lang chiang chu, tunlai khawvel buai takah hian ram mipuite'n an duh a, hruaitute'n tharum thawhna aia remna leh muanna an dah sàn tlat chuan remna tluantling a awm thei a ni," a ti a; remna leh muanna chawi sángin, state intodelh ni tura ṭan lak a ṭul thu leh HIV/AIDS, cancer leh ruihhlo do kawngah sorkar thawhpui a ṭul thu a sawi.
Sorkarin hmathlir, hmachhawp leh tihhlawhtlin tur chiang tak nei mah se, sorkar hnathawkte tel loin hmalak theih a ni lo tih sawiin Larsap chuan, "State Day-ah hian sorkar hnathawk zinga a tê ber aṭanga a lian ber thlengin taima leh phûr taka thawk a, inhlàn thar turin ka ngen che u a ni," a ti. Kum 2020-21 atana Mizoram budget chu lungawithlak a tih thu sawiin, "State dangte'n deficit budget an kalpui mek laia Chief Minister leh a thawhpuite'n surplus budget an chhawp thei hi a phurawm tak zet a ni," a ti bawk.
CM Zoramthanga chuan, Mizo mipui chu State Day chibai bûkin, Mizote chu Pathianin meichher chhi êng tura a duh thu a sawi a, "NGO te, party-te leh Mizo mipui duh danin Pathianin state-ah min dah lo, ama duh dan angin min dah a ni. Economy, sakhuana leh politics-ah meichher chhi turin min duh," a ti.
Mizoram chu sorkar laipui, Myanmar sorkar leh Bangladesh sorkarin an mamawh nia sawiin Zoramthanga chuan, "Mizoramin tuna a thawn chhuah theih ṭha ber chu remna a ni," a ti a; economy-ah entawn tura awm a ngaih thu te, sorkarin a kalpui dan tur pawh a danglam thu leh 'whole system' in an kal loh thute a sawi.
Chief Minister chuan, Mizoram state a pianna kawngah harsatna tam tak an tawh thu sawiin, ramhnuai sorkar, mipui, NGO leh kohhrante an inlungrualna avangin Mizoram a pian thu a sawi a, "Chu chuan bargaining power min neihtir a, chuta ṭang chuan Mizoram state hi lo piangin, kan constitutional provision neih ang hi a lo chhuak ta a ni," a ti.
Aizawla State Day lawmna inkhawm hi chief secretary Lalnunmawia Chuaungo-in a kaihruai a, minister, MLA leh sorkar officer-te an tel. NGO Coordination Committee chairman Vanlalruata pawhin thu a sawi a ni.
Mizoram hi kum 1972
aṭanga union territory a nih hnuah, February 20, 1987 khan state puitlingah hlànkai a ni a, India ram state 23-na a ni. State a nih tirh chuan district pathum - Aizawl, Lunglei leh Chhimtuipui district-ahte ṭhen a ni a, tunah chuan district 11 a awm tawh a ni.