Corruption case nei mek CM kaihhruai MNF sorkarin Lokayukta an ṭhiat - ZPM GS

Zoram Peoples' Movement (ZPM) chuan nimin khan an pisaah inkhawm an buatsaih a, an general secretary Phairothanga'n thu sawiin,  corruption case nei mek chief minister Zoramthanga kaihhruai MNF sorkar-in eirukna dotu tur Lokayukta chu ṭhiatin, Vigilance hnuaiah a dah tih a sawi.

ZPM General Secretary chuan, chief minister thlenga chhui thei tur Lokayukta chu corruption case nei mek MNF sorkar chuan Vigilance hnuaiah an dah tih sawiin, "Corruption ûmbo beisei ram hmangaihtute leh zirlai pawl hrang hrangin an vei em em kha an tihlamzuih fel ta der mai. Ram hmasawnna atana sum lo kal chu an duh duhin an eiru zo leh dawn a nih hmel ta ber a, ram leh hnam tana martar, thisen luanga nunna hlântute lung hi a awi bik ka ring lo. Kalphung hi thlak a ngai tak zet mai. 'Aw tuna kan ram dinhmun hi dáwn ve la lung a áwi nêm maw’ tih hla hi sak a ngaih loh hun a va nghahhlelhawm tak êm," a ti.

Phairothanga chuan, Mizoram hmun tinah kawng a chhia tih sawiin, "Kum khat pawh daih lo kawngpui kan nei reng maite hi contractor leh minister-te inkara hnung thak inhiah tawnna thil thleng ṭhin avangin contractor-te chu kan officer-te'n an thunun thei lo a, hnain a tuar a, a tawpah mipuiin kan tuar ta ṭhin a ni," a ti a; chu'nga thil dik lote chu Lokayukta ṭhiah a nih bawk si avangin chhui ngaihna a awm tawh lo niin a sawi bawk.