CAB bawhzui turin sorkar phût

MPC president Lalhma­ngaiha Sailo chuan, BJP kaihhruai sor­­kar laipuiin Citizenship Amendment Bill (CAB) kaltlangpui a tum chu Mizoram tana him turin siam a nih dawn thu Union Home minister Amit Shah-a'n Mizorama Joint NGO-te hmaa a tiam tawh chu tun aṭang­in chak taka bawhzui turin Mizoram sorkar an phût tih a sawi.

Lalhmangaiha Sailo hian nimin khan an party pisaa MPC office bearer meeting-ah thu sawiin, CAB chu November 2019-a Parliament session-ah pass ngei tur tia Home minister Amit Shah-a'n a sawi thu a sawi a, "Hei vang hian November 4, 2019 aṭang hian Assam zirlai pawl inzawmkhawm, AASU chuan CAB duh lohna leh dodalna lantir chhunzawm leh tumin theihtawp chhuahin an inbuatsaih a, BJP kaihhruai sorkar hian engti kawng mahin Assam-ah CAB hi an hmang tur a ni lo, an ti a ni," a ti.

Assam state-in nasa taka engkim huama CAB tihhlawh­tlin tumnaa dodalna lantir chhunzawm zel an tum lai a, Mizoram tan a hlauhawm ve lo tura insawi thlamuanna ringawt chu a tâwk zo lo hlea an hriat thu sawiin MPC President chuan, "Mizoram tana CAB laka kan himna tura Home minister Amit Shah-a'n NGO-te hmaa a tiam kha a tak ram a thlen ngei theih nan tun aṭang hian chak taka bawhzuia hma la nghal turin Mizoram sorkar kan phût tak meuh a ni,"’ a ti.