Finance dept.-ah sum a tam ber

Chief minister Zoram­thanga'n kum 2020-2021 Mizoram budget tur, February 19, 2020-a a pharh tâkah sorkar department zingah Finance department sum chan tur a tam ber.

Budget hi department 47-ah sem sawm a ni a, a chang tam ber Finance department-in cheng vbc. 2,197.76 a chang dawn. A chang tam ber dawttu School Education department-in cheng vbc. 1,554.64 an chang dawn a; sum chang tlem ber tur Parliamentary Affairs department-in cheng nuai 84.70 an chang dawn a ni.

Tarlan tawh angin, CM Zoramthanga chuan depart­ment-ah sum an dah vak vak dawn loh thu a lo sawi tawh. Chief Minister sawi danin, 2020-21 budget chu project base budget a ni a; tun hma angin department-ah sum dah vak vak a ni dawn lo a, an mamawh zualpui erawh dah a ni ang. Department-te'n project an siam ang a, chumi do lêtna tur chu pek ṭhin a ni dawn a ni.