Diknain ro a rêl theih nan sorkarin Theihtawp a chhuah - Chief Minister

Chief Minister chuan, Vigilance Awareness Week chu hlemhlêtna leh eirûkna laka fihlim theihna tura hmalak tharna tur a nih thu sawiin, inkhawma telte chu dikna ûm a, thil dik lo leh sual laka fihlim turin a sáwm a, "Corruption leh thil sual dang khawih lo a, mi dangte tana hnawk lo tura fimkhur a pawimawh. Thil dik lo tiduh lote awm khawmnaah chuan nun a zalên hle ṭhin," a ti.

Diknain ro a rèl theihna turin sorkarin theihtawp a chhuah tih sawiin Chief Minister chuan, "Lokayukta din kawngah pawh Mizoram hi India hmarchhaka hma hruaitute zing a mi a ni. Mipui vantlang ṭhatna turin leh dikna leh rinawmna entawn tlak lantir i tum ang u," a ti a; inven fimkhur chuan sualnaah an lut lo nge nge ṭhin tih a sawi.

Khualzahawm C Lal­sawta, Lokayukta chairman chuan, ram changkang lo apiangah corruption a tam ṭhin a, ram changkang apiangah corruption dona khawl a ṭhain mi an rinawm zawk ṭhin tih a sawi a, "Thil sual tih chiang taka hriat chu complaint thehluh hreh tur a ni lo," a ti.

Inkhawm kaihruaitu Lalnunmawia Chuaungo, chief secretary chuan, Vigi­lance Awarness Week chuan thil tisualtute chhui a, ûm zui leh an phu tâwk hremna lama hmasawn chauh a kâwk lo tih sawiin, a tìr aṭanga thil fel lo leh dik lo a awm loh zawk nan mi tin an fimkhur thar lehna tura inzirtirna ni zawk se, tiin kal khawmte a sáwm.

Inkhawma tel sorkar hnathawk leh zirlaite chuan rinawm tura intiamna thutiam an sawiho. Kumin Vigilance Awarness Campaign thupui chu 'Integrity - A way of life' (Dikna - Nunphunga neih) tih a ni. Vigilance Awareness Week hi Siahaah chuan DRDA Conference Hall-ah hman a ni a; additional DC K Vanlalṭhiana'n a kaihruai a, Anti Corruption Bureau-a deputy SP B Lalnghakliana'n eirukna kaihhnawih dan leh hraite a sawi bakah, zawhnate a chháng.

Champhaiah pawh Champhai College multi­purpose hall-ah Vigilance Awareness Week pualin hun hman a ni a, Champhai bawrhsap Alexander V Chongthu-in a hawng. Champhai additional SP J Lalmuankima'n thupui a sawi a, SDC Dr Manesia Khaimeichho kaihhruaiin thutiam sawi rual a ni bawk. Vigilance Awareness Week hi kum tin Sardar Vallabhai Patel pian champha phak pualin October 28 - November 2 chhung hman ṭhin a ni.

1.    Dan kaihhruaina, dikna leh rinawmna ka zâwm ang.

2.    Thamna ka pe lo ang a, ka la hek lo ang.

3.    Ka hmaa tih tur awmte chu rinawm tak leh langtlang thei turin ka thawk ang.

4.    Mipui vantlang ṭhatna turin ka thawk ang.

5.    Ka nunah dikna leh rinawmna entawn tlak ka lantir ang.

6.    Eirûkna leh a kaihhnawihah, a buaipuitute hnen ka thlen zel ang.