Lalnunmawia'n thutlukna a la siam lo

Mizoram chief secretary ni mek Lalnunmawia Chuaungo, IAS chuan, sorkar laipuiah secretary hna a chelh dawn leh dawn lohah thutlukna a la siam loh thu a sawi.

Vanglaini palai zawhna chhangin Lalnunmawia Chuaungo chuan, IAS zawng zawng tan Central-a secretary a nih ngawt theih loh tih sawiin, "IAS-ah hian batch khata hmun thuma ṭhena hmun khat velin Central-ah secretary nih theihna chance an nei. Hetiang a nih laia Central secretary ni thei tur zinga min thlang ve hi lawmawm ka ti tak zet a ni," a ti.

Lalnunmawia Chuaungo chuan, secretary hna a chelh dawn leh dawn loh a la ngaihtuah loh thu sawiin, "Tunah hian ka hna chelh tur min offer (zawrh) an la nei lo a, ministry chelh tura min tih azirin thutlukna ka siam ang," a ti a; secretary hna chelh leh chelh loh chu mimal thutlukna tur a nih thu a sawi.

Tarlan tawh angin, Mizoram aṭangin sorkar laipuia secretary ni thei chu P Rohmingthanga, IAS (Rtd.) chiah a la awm a; Lalnunmawia Chuaungo hian a pawm chuan a pahnihna a ni ang.