Zophaiah mosque sa tawh lo turin hriattir Masjid Committee-in chawlhsan an tum lo
Kolasib SP Vanlalfaka Ralte chuan, Bairabi Zophaia mosque (biak-in) satute chu hna thawk chhunzawm tawh lo turin a hriattir. Hetih lai hian, mosque satu Kachurchol Masjid Committee (KMC) chuan, mosque chu sa chhunzawm zel tura an inngaih thu Kolasib SP an hrilh.
Mizoram sorkar tirhin Kolasib SP leh Kolasib DFO-te chu October 28, Thawhṭanni khan Bairabi-ah an kal a, KMC hruaitute nen an inkâwm. Inkawmnaah hian Kolasib SP chuan, mosque sak chhunzawm tawh lo tura hriattirna KMC hruaitute hnenah a pe a ni.
Thu dawn danin, meeting-ah hian KMC hruaitute chuan mosque chu tun hma aṭanga ding tawh, sawiselna pawh awm ngai lo a nih thu an sawi a, "Bomb hmanga tihchhiat avanga sa ṭha leh chauh kan ni. Sa chhunzawm zel turah kan inngai. Bungraw dahna leh hnathawktu ho awmna tur sakte hi chu mosque sak zawh velah ṭhiah leh turin kan ti a ni," an ti.
KMC hruaitute chuan, mosque a awm avangin mosque awmna hmun chu Mizoram emaw Assam emaw ram chhung a ni tihna a ni lo nia sawiin, DC level-a inbiakna buatsaih leh a, chutah chuan an dinhmun sawi chhuahtir nise an duh thu meeting-ah hian an thlen a ni.
Vanglaini palai zawhna chhangin Kolasib SP chuan, order an pek kenkawh a nih dawn leh dawn loh chu sorkar thuneitute thu thu a nih thu a sawi. Hetih lai hian, Vanglaini palai zawhna chhangin chief secretary Lalnunmawia Chuaungo chuan, Bairabi Zophai chungchangah Mizoram sorkarin hma an lak reng thu a sawi a, "Assam Chief Secretary hnenah pawh lehkha ka thawn tawh," a ti.
Assam leh Mizoram ramri ngaihtuahtu Core Committee thupek bawhzuiin September 10, 2019 zan khan Bairabi Zophaia Mosolman biak-in satu KMC hnenah Kolasib DFO hmingin mosque sa chhunzawm lo tura hriattirna pek a ni a; hun eng emaw chen mosque sak hna chawlhsan a nih hnuah, tun hnai khan sak chhunzawm leh a ni.