Lawngtlaiah ITDP hawn a ni
Lawngtlai RD Block chhunga khaw 10-a World Vision India, Chhimtuipui Area Development Programme (CADP)-in mi rethei leh harsa zawkte dâwmkânna tura 'Integrated Tribal Development Project' an kalpui tur chu nimin khan Lawngtlaia Central YLA Hall-ah Agriculture minister C Lalrinsanga'n a hawng.
Minister C Lalrinsanga chuan, ITDP chuan ei leh bàra intodelh tur te, sum deh chhuahna ngêlnghet nei tur te, sum khâwl tur leh vantlang hriselna atantea zirtirna leh hmalakna hrang hrang a huam tel tih sawiin, "Hmasawnna tura mamawh a kim a, a kalpuina tur khuate leh Lawngtlai district pumpui tan malsawmna ropui tak a nih dawn avangin a hlawhchham thiang lo," a ti.
C Lalrinsanga chuan, chaw leh chawhmeh leh ei siamna bâwl hlo hrang hrangah mahni thar chhuah ngei hman a hun tawh tih sawiin, "Phai aṭanga damdawi hmanga sâwngbàwl thlai lo kal ṭhin, hriselna atan pawha pawi theite hi malmâk a, mahni thar chhuah thlai thianghlim leh hrisela intodelh tura ṭan lak a ṭul tak zet a ni," a ti a; chutiang atan chuan ITDP hmalakna chu hlawhtlinpui a pawimawh thu a sawi.
ITDP hawnnaah hian World Vision India hnuaia Technical Programme-a hotu Dr James Neil Devasahayam leh senior programme director Anil Joseph te, NABARD-a district development manager Evan T Munsong leh Mizoram Regional Office-a general manager SN Mallick te pawhin thu an sawi a ni.
ITDP hi National Bank for Agriculture and Rural Development (NABARD) hnuaia Tribal Development Fund (TDF) sum hmanga kalpui tur a ni a, cheng nuai 170 ruahman a ni. Lawngtlai RD block chhunga khaw 10 - Chawnhù, Mámpui, Chawntlangpui, Sihtlangpui, Káwlchaw West, Káwlchaw East (Siaha District), Saikah, Pàithàr, R Vànhnè leh Rúlkualah te kum ruk chhung kalpui a ni ang.