KHAWTHLIR

Economics & Statistics department chuan Mizoram Statistical Database (Time Series Statistical Database) chu a duh apiangte tlawh theih turin an tlangzarh. Mizoram Statistical Database (Time Series Statistical Database) hi www.mizoramdata.in ah a duh apiangte tan en theih a ni a, statistics chi hrang hrang dah a ni.

Government Aizawl College NSS Unit leh Red Ribbon Club-te chuan nimin khan an college-ah blood donation camp an huaihawt a, Aizawl Civil Hospital tan thisen unit 123 an pe a, a petute mipa 107 leh hmeichhia 16 an ni.

Nimin khan MZP Pisapuiah MZP hruaitute leh Joint Welfare Action Committee (JWAC) Tripura leh Assama Zo hnahthlak chi péng hrang hrang inzawmkhawmte an inkâwm a, MZP president L Ramdinliana Renthlei-in a kaihruai. Tripura-a JWAC leh Assam-a Zo hnahthlak péng hrang hrang pawlte Molsom, Hrángkhawl, Chorei, Sakachep, Kaihpeng leh Ranglong hnamte inzawm­khawm pawl an ni.

Vawiin hian Mara Autonomous District Council (MADC) hnuaiah Tokalo bialah MDC by-election neih a ni dawn a, zing dar 7 aṭanga tlai dar 4 thleng vote thlak hun hawn a ni ang. By-election buatsaihtu chu State Election Commission a ni a, vawiinah inthlan a nih dawn avang hian October 28, Thawhṭanni tlai dar 4 khan campaign hun a tâwp. MADC MDC by-election-ah hian BJP candidate M Laikaw leh MNF candidate Chotha Hlychho te an inkhing dawn a ni.

School Education minister Lalchhandama Ralte chuan October 28, Thawhṭanni tlai khan Zemabawk Higher Secondary School building thar a hawng. Zemabawk HSS in sak thar hi a dung ft. 60 leh a vâng ft. 24 a ni a, cheng nuai 30 hmangin contractor Lushai Engineers-in an sa a ni. Zemabawk HSS-ah hian zirlai 380 awmin, high school section-ah zirlai 270 an awm mek a, thawktu mi 51 an awm a ni.