Zirtirtu hna hi sawn theih hna a ni - School Education Minister

School Education minister Lalchhandama Ralte chuan nimin khan Synod Conference Centre-a Higher Secondary School Lecturer’s Association of Mizoram (HISSLAM) Annual Assembly vawi 21-na a hmanpui a, thu sawiin, "Zirtirtu hna hi transferable post (sawn theih) a ni a, Aizawla thawh ringawt hi in bat a ni lo tih hre thar turin ka duh che u," a ti.

Minister Lalchhandama chuan, Mizoramah education service mumal tak awm thei se a duh thu sawiin, "Mizoram zirna kalphung siamṭhat nan zirtirtu pawl hrang hrangte aw khat nei turin lungrual taka thawhho a pawimawh," a ti a; administrative setup ṭha tak neih a ṭul thu a sawi.

Rualkhai zawka transfer leh posting kalpui a nih theih nan sorkarin transfer & posting rules a ruahman mek thu sawiin Lalchhamdama chuan, "Law lamah vet turin kan ti tawh a, kum thar budget session-ah chuan pharh hman a ni mai thei," a ti a; sorkar hnathawkte leh zirtirtute chu sorkarin ṭul a tihna hmuna sawn theih an nih avangin, Aizawla awm ringawt chu an bat a ni lo tih hre thar turin zirtirtute a chah.

Lalchhamdama Ralte chuan, zirtirtute chu naupangte aia advance tura chahin, "In zirlai naupangte hi kum 15-18 rual an ni a, tunlai khawvel thiamna ṭhang mekah an sang em em a, information technology lamah phei chuan an sáng khawp mai. Chuvang chuan, nangni pawh zirlaite heti lama kaihruai thei tur leh an ngaihsan ni thei turin in update ṭhin rawh u," a ti.

School Education Minister chuan, zirtirtute chu Mizo hnam thil leh Kristian nunphungte zirtir uar tur leh missionary thinlung púa hun vawng dik leh smart taka office kal ṭhin turin a chah bawk. Minister hian HISSLAM member pension-te hnenah chawimawina thuchei a hlan nghal a ni.

HISSLAM Annual Assembly hi chawhma lamah an vice president C Laldinliana’n a kaihruai a, chawhnuah president Vanlalzuata'n kaihruaiin ro an rel a, hruaitu thar an thlang bawk.

1.    Principal Recruitment Rules hi 100% seniority-in kal se kan ti.

2.     Govt. HSS lecturer-te pay hi selection grade hian principal basic pay pha rawh se.

3.    Mizoram Education Service Rules inspecting officer-in an siam hi a nih dan ang ngau ngau chuan kan pawm thei lo a, MES Rules hi kum 2019-a hruaitu thlante'n lo zirchiangin bawhzui se kan ti.