School Education Minister thil tih dan MPC ṭhalaite'n vanduaithlak an ti

MPC party ṭhalai chuan thuchhuah siamin, Congress-in an sorkar laia SSA leh RMSA hnuaia zirtirtu lakna atana dan an siam chawp, a felhlel a ni tih hre reng chunga siamṭhat tum loa hmang chhunzawm zel duhtu School Education Minis­ter, Mizoramin a hrawn leh ta chu vanduaithlak an tih tak zet thu an tarlang.

MPCY chuan, tun hnaiah SSA leh RMSA hnuaia advertisement chhuah loa zirtirtu 91 lak chungchangah, "Congress leh MNF-te inchirhthehna nasa tak lo lang thar leh hian heng party pa­hnihte ngei hi kan rama zirna tlak­chhiatna thlentu an nihzia a ti chiang­ hleah kan ngai," an ti.

MPC ṭhalai chuan, "Mizorama sorkarna chelh tawh ṭhin leh chelh mektu Congress leh MNF party-te'n a thiam leh tlingte chauh zirtirtuah la loa party mi leh duhsak zawngte chauh lâk theihna tura dan phuahchawp vawiin thlenga an hman ṭhin avanga kan rama zirnain nasa taka a tlak chhiat phah te, central civil service-ah Mizo ṭhalaite kan tlakhniam phah hle maite hi hnam ang pawhin a mualphothlak kan ti hle a ni," an ti bawk.

MPCY hian Education minister Lalchhandama Ralte chu Congress sorkar laia zirtirtu lakna atana dan an siam chu rochun zui zel lo a, a thiam leh tlingte chauh zirtirtu atana la tawh turin an phût a ni.