Champhaiah SARAS Fair ṭan a ni
Nimin aṭang khan Champhaia Vanlallawma Indoor Stadium-ah Regional Sales of Rural Artisans Society (SARAS) Fair 2019 buatsaih ṭan a ni a, Rural Development minister Lalruatkima’n a hawng.
Lalruatkima chuan, SARAS Fair buatsaih ṭhin chu Ministry of Rural Development hmalakna, thingtlanga chêngte thil siam chhuah pholanna leh chawisanna tura duan a nih thu sawiin, "India ram pum angin ngaihhlut a hlawh a, he hun hlu tak chhim tur hian India ram mai bakah, ram páwn aṭangte thleng pawhin mi tam tak an kal khawm ṭhin a ni," a ti.
RD Minister chuan, SARAS Fair chuan self help group (SHG) member zawng zawngte thinlungah hmasawnna ngêlnghet zawk a tuh a, chona leh phûrna nasa zawk a pek ngei a beisei thu a sawi a; SHG-te'n harsatna an tawh cháng pawhin puih a inhuam reng a, rintlak taka SHG kalpuitute chuan hamṭhatna chi hrang hrang an hmuh zel dawn thu a sawi bawk.
Champhaia Regional SARAS Fair-ah hian Mizoram hmun hrang hrang aṭangin SHG member 100 an tel a, dawr 50 awmin, district pangaa RD Block 14 an tel a; November 8, 2019 thleng buatsaih a ni ang. RD secretary leh MzSRLM state mission director Lalhmingthanga sawi danin, kum 2011-ah National Rural Livelihoods Mission (NRLM) din a ni a, NRLM hnuaiah state tinah SHG-te enkawltu tur dinin, Mizoramah pawh Mizoram State Rural Livelihoods Mission (MzSRLM) chu kum 2013-ah din a ni.
MzSRLM hian Kolasib, Serchhip, Mamit, Lawngtlai, Champhai leh Siaha district-a RD block tinah hma a la mek a, kum 2022-ah chuan Mizorama district tina khua zawng zawng tuam chhuah tum a ni.