MNF hotute thusawi leh Thil tih a inpersan - ZPM Ṭhalai
Zoram Peoples' Movement (ZPM) ṭhalai hruaitute chuan February 19, Nilaini khan PHE department engineer-in-chief pisa tur, New Capital Complex-a sak mek chu an enfiah a; sorkar hotute thusawi leh a taka thil awm dan a inpersan tih an tarlang.
ZPM ṭhalaite chuan MNF-te'n Congress hunlaia an sawisel an duh lohna hmunah chiah tunah hian PHE E-in-C pisa tur an saktir niin an puh.
ZPM ṭhalai thuchhuah chuan, PHE E-in-C pisa tur sak chungchangah Congress sorkar lai aṭangin a fel lo tawh a, New Secretariat Complex Welfare Committee nen pawh buaina a lo awm tawh tih a tarlang a, "PHE E-in-C office sak hi MNF-in Congress sorkar laiin nasa takin an lo do tawh a, MNF ṭhalaite a hmunah kalin hna thawktute pawh chhunzawm lo turin an lo hrilh tawh a ni," a ti.
ZPM ṭhalai tarlan danin, MNF vice president Vanlalzawma, Aizawl West-III bialtu MLA a nih laiin PHE E-in-C pisa sak a nih danah thil fel loh avangin in chu sak chhunzawm a duh loh thu a ziah a awm a, MNF MLA Lalruatkima leh MNF party hruaitute nen an tlawh ṭuma a thusawi pawh hmuh theihin a la awm a ni.
MNF-in sorkarna an chan hnu lawk, January 10, 2019-ah chief minister Zoramthanga'n a hmunah a enfiah a, in sakna hmun chu Congress sorkar laiin building awm reng sia ram ruak anga lantir (show) a nih thu sawiin, hnathawh titawp nghal turin a hriatti. Hei hi MNF-in January 10, 2019-ah press release hmangin an tarlang bawk.
MNF hruaitute'n PHE E-in-C pisa tur sak mek hmun a tlawh a, an duh loh thu vawi tam an auchhuahpui tawh chu MNF sorkarah ngei Chief Minister leh Deputy Chief Minister-te remtihpuinain sak chhunzawmna tur order February 7, 2020-ah tihchhuah a ni a; chu chu mak an tih thu ZPM ṭhalaite chuan an sawi.
ZPM ṭhalai chuan, "Inthlan dawna cheng nuai thum sem tura intiamin, sorkarna an siam hnuah hmuia khawn ang hlauha an sawi zui leh duh tawh miah lo ang maiin, PHE E-in-C office sak meka MNF thuchhuak leh an hmalakna chu thil inpersan tak niin kan hria," an ti a; MNF party chu Zoram mipui hmaizah vang tal pawha an tih theih loh tur leh an tih ngam leh si loh tur chu au chhuahpui tawh lo turin an ngen a ni.